بۇگىن «AMANAT» پارتياسىنىڭ اتقارۋشى حاتشىسى اسحات ورالوۆ سولتۇستىك قازاقستان وبلىسىندا جەرگىلىكتى اگرارلارمەن، زيالى قاۋىم وكىلدەرىمەن، بپۇ توراعالارىمەن جانە پارتيا اكتيۆىمەن ءبىرقاتار كەزدەسۋ وتكىزدى.
اسحات ورالوۆ ماعجان جۇمابايەۆ اتىنداعى اۋداننىڭ پولۋدينسكوە اۋىلىنداعى ءسۇت-تاۋار فەرماسىنىڭ الاڭىندا وبلىستاعى اۋىل شارۋاشىلىعى تاۋار وندىرۋشىلەرىمەن كەزدەسىپ، الداعى كونستيتۋسيالىق رەفورمانىڭ ماڭىزىن تالقىلادى.
«كونستيتۋسيالىق رەفورما – «جاڭا قازاقستاندى» قۇرۋدىڭ ناقتى مەحانيزمى. اتا زاڭىمىزدا جەر حالىقتىڭ مەنشىگى دەپ كورسەتىلەدى. بۇل – وتە ماڭىزدى قادام. سولتۇستىك قازاقستان وبلىسىندا حالىقتىڭ باسىم بولىگى اۋىل شارۋاشىلىعىمەن اينالىسادى. سوندىقتان 5 ماۋسىم كۇنى وتەتىن رەفەرەندۋمعا وبلىس تۇرعىندارى بەلسەنە قاتىسادى دەگەن ويدامىز»، دەدى «AMANAT» پارتياسىنىڭ اتقارۋشى حاتشىسى.
ءوز كەزەگىندە، وسىنداعى شارۋا قوجالىقتارى ءبىرىنىڭ باسشىسى التىنبەك ساپاروۆ تۇرعىندار ەل دامۋىنداعى جاڭا كەزەڭدى رەفەرەندۋممەن بايلانىستىراتىنىن اتاپ ءوتتى.
«حالىق بولىپ جاتقان وزگەرىستەردى كورىپ وتىر جانە تاۋەلسىزدىگىمىزدى ودان ءارى نىعايتىپ، ەلىمىزدى دامىتۋ ءۇشىن كونستيتۋسياعا قاجەتتى وزگەرىستەر ەنگىزۋدى قولداۋعا دايىن»، دەدى التىنبەك ساپاروۆ.
بۇدان سوڭ اتقارۋشى حاتشى ءوڭىردىڭ زيالى قاۋىم وكىلدەرىمەن جانە پارتيا ارداگەرلەرىمەن جۇزدەستى. كەزدەسۋگە قاتىسۋشىلار اتا زاڭعا تۇزەتۋلەر ەنگىزۋگە قاتىستى جالپىحالىقتىق داۋىس بەرۋ «جاڭا قازاقستاندى» قۇرۋدا نەگىزگى ءرول اتقاراتىنىن اتاپ ءوتتى.
سونىمەن قاتار، اسحات ورالوۆ باستاۋىش پارتيا ۇيىمدارىنىڭ توراعالارىمەن دە كەزدەستى. ول پارتيانىڭ قوزعاۋشى كۇشى – بپۇ-نىڭ بازاسىندا جالپىۇلتتىق رەفەرەندۋمنىڭ ءمانى تۋرالى ءتۇسىندىرۋ جۇمىستارى بەلسەندى جۇرگىزىلۋگە ءتيىس ەكەنىن اتاپ ءوتتى.
وسى كۇنى ءوڭىردىڭ پارتيا اكتيۆىمەن كەزدەسۋ ءوتتى. بۇگىنگى تاڭدا وبلىستا قۇرامىندا 28 مىڭنان استام پارتيا مۇشەسى بار 246 بپۇ جۇمىس ىستەيدى.
«AMANAT» پارتياسىنىڭ باسپا ءسوز قىزمەتى
پىكىر قالدىرۋ