ءماجىلىس ءتوراعاسى ەرلان قوشانوۆ تۇركىتىلدەس ەلدەر پارلامەنتتىك اسسامبلەياسىنىڭ (تۇركپا) باس حاتشىسى مەحمەت سۇرەييا ەردى قابىلدادى.
كەزدەسۋ بارىسىندا ەرلان قوشانوۆ ەلىمىز تاۋەلسىزدىك تاريحىندا جاڭا كەزەڭگە قادام باسىپ وتىرعانىن اتاپ ءوتتى.
– ءبىزدىڭ پرەزيدەنتىمىز كونستيتۋسيالىق وزگەرىستەرگە بايلانىستى رەفەرەندۋم وتكىزۋ تۋرالى باستاما كوتەردى. بۇل ۋاقىت تالابىنان جانە قوعام سۇرانىسىنان تۋىنداپ وتىرعان تاريحي شەشىم. وسىعان بايلانىستى ەلىمىزگە تۇركپا-نىڭ بايقاۋشىلارى دا كەلدى. بۇل جۇمىسقا ءوزىڭىز دە اتسالىسىپ وتىرسىز، – دەدى ءماجىلىس ءتوراعاسى.
ءوز كەزەگىندە س.ەر الداعى رەفەرەندۋمنىڭ ءساتتى وتەتىنىنە تىلەكتەستىك ءبىلدىرىپ، بۇل قازاقستاننىڭ ودان ءارى دامۋى جولىنداعى ماڭىزدى كەزەڭ بولاتىنىنا سەنىم ءبىلدىردى.
– ءبىز قازاقستاندى ەۋرازيانىڭ جارقىراعان جۇلدىزى دەپ بىلەمىز. قازاقستان پرەزيدەنتى قاسىم-جومارت توقايەۆتىڭ حالىققا جولداۋىنا ءوزى اتاپ وتكەن رەفورامالار نەگىزىندە اتا زاڭعا وزگەرىستەر ەنگىزىلگەلى وتىر. سوندىقتان الداعى رەفەرەندۋمنىڭ ءساتتى وتۋىنە شىن جۇرەكتەن تىلەكتەسپىن، – دەدى تۇركپا-نىڭ باس حاتشىسى.
ءماجىلىس ءتوراعاسى ەرلان قوشانوۆ مەحمەت ەرگە رەسپۋبليكالىق رەفەرەندۋم جۇمىسىنا قاتىسۋعا بەلسەندىلىك تانىتقانى ءۇشىن ريزاشىلىق ءبىلدىردى.
سونىمەن قاتار كەزدەسۋدە تاراپتار قىرعىزستاندا وتەتىن تۇركپا-نىڭ ءحى كەڭەسى مەن جالپى وتىرىسىنا قاتىستى ماسەلەلەردى تالقىلادى. اتالعان جيىندا ۇيىمنىڭ 2023-2028 جىلدارعا ارنالعان ستراتەگيالىق جول كارتاسىن بەكىتۋ جوسپارلانعان.
ءماجىلىستىڭ باسپا ءسوز قىزمەتى
