قازاقستاندا كونستيتۋسياعا ەنگىزىلەتىن تۇزەتۋلەر بويىنشا رەفەرەندۋم باستالدى. شىعىس قازاقستان وبلىسىنىڭ ۋچاسكەلەرىندە تاڭعى ساعات 7.00-دەن باستاپ سايلاۋشىلاردىڭ ۇلكەن لەگى بايقالادى.

شقو ۇلان اۋدانىنىڭ تۇرعىندارى 88 جاستاعى قاسەنجار ەسكەندىروۆ پەن 85 جاستاعى شامزادا ەسكەندىروۆا ازاماتتىق جاۋاپكەرشىلىك دەڭگەيىن جانە وسى وقيعانىڭ ماڭىزدىلىعىن سەزىنىپ، العاشقىلاردىڭ ءبىرى بولىپ رەفەرەندۋم ۋچاسكەسىنە كەلىپ، ءوز تاڭداۋلارىن جاسادى.

"ۇسىنىلىپ وتىرعان تۇزەتۋلەردىڭ ماڭىزدىلىعىن تۇسىنە وتىرىپ، ءبىز بۇگىن داۋىس بەرۋگە كەلدىك. ويتكەنى، بۇل ءار ازاماتتىڭ قۇقىعى، - دەدى قاسەنجار اقساقال.

قاريا باتاسىن بەرىپ، قازاقستان حالقىنا بەيبىتشىلىك پەن باق-بەرەكە تىلەدى.

"مەن ءارقاشان ءبىرىنشى بولىپ داۋىس بەرەمىن جانە بۇگىن ءبىرىنشى بولىپ داۋىس بەردىم. ويتكەنى، بۇل وتە ماڭىزدى وقيعا. رەفەرەندۋم مەن ءۇشىن مەرەكە، سوندىقتان مەن ءاربىر داۋىس بەرۋشى ءۇشىن جاۋاپكەرشىلىكتى تۇسىنەمىن"، - دەدى كۋرچاتوۆ قالاسىنىڭ تۇرعىنى قارلىعاش بازىلوۆا.

وبلىستاعى بارلىق ەلدى مەكەندەردە ۋچاسكەلەردەگى بەلسەندىلىك بايقالادى. مىسالى، بەسقاراعاي اۋدانىنداعى 411 رەفەرەندۋم ۋچاسكەسىندە العاش رەت قارلىعاش مادەنيەت قىزى داۋىس بەردى. كوميسسيا مۇشەلەرى ەستەلىك رەتىندە سىيلىق تابىس ەتتى.

وسى ۋاقىتتا وسكەمەندە 120 رەفەرەندۋم ۋچاسكە ءوز ەسىگىن اشتى، 110 ۋچاسكەدە باقىلاۋشىلار تىركەلدى. العاشقى داۋىس بەرۋشىلەرگە ەستەلىك سىيلىقتار بەرىلدى.

وڭىرلىك سايلاۋ كوميسسياسىنىڭ دەرەكتەرى بويىنشا، شقو-دا بارلىق 1027 ۋچاسكە، ونىڭ ىشىندە 959 اشىق ۋچاسكە جانە ازاماتتاردىڭ ۋاقىتشا بولۋ ورىندارىندا 68 ۋچاسكە جۇمىس ىستەيدى. وبلىستىق اۋماقتىق رەفەرەندۋم كوميسسياسىندا 9114 ەسەپتەن شىعارۋ كۋالىگى دايىندالدى. ەسەپتەن شىعارۋ كۋالىگىن العان ازاماتتار باسقا ەلدى مەكەندەردە داۋىس بەرە الادى. (ءبىر ەلدى مەكەن شەگىندە ەسەپتەن شىعارۋ كۋالىكتەرى بەرىلمەيدى).

وبلىس بويىنشا 911 455 ازامات رەفەرەندۋمعا قاتىسۋعا قۇقىلى

شقو اقپارات ورتالىعى