تامارا دۇيسەنوۆا اۋەلى بوس جۇمىس ورىندارىنا ونلاين جارمەڭكە وتكىزۋ ارقىلى جاستاردى ەڭبەكپەن قامتۋ قولعا الىناتىنىن اتاپ ءوتتى. بوس جۇمىس ورىنداردىڭ العاشقى ونلاين-جارمەڭكەسى 24-30 ماۋسىم ارالىعىندا وتەدى دەپ جوسپارلانعان.
"كەلەشەكتە اي سايىن تۇراقتى ۇيىمداستىرۋ كوزدەلىپ وتىرعان جارمەڭكە تەك كاسىپورىن ورنالاسقان ايماق تۇرعىندارىنا عانا ەمەس، بارلىق قازاقستاندىقتارعا بىردەي قولجەتىمدى بولماق" دەلىنگەن ۆەدومستۆو حابارلاماسىندا.
دۇيسەنوۆا جۇمىسقا ورنالاستىرۋدىڭ ەكىنشى تەتىگى ۇلتتىق جوبالار ارقىلى جۇزەگە اسىرىلاتىنىن جەتكىزدى. جەرگىلىكتى اتقارۋشى ورگانداردىڭ دەرەكتەرى بويىنشا، بيىل ۇلتتىق جوبالار اياسىندا 269 مىڭنان استام جاڭا جۇمىس ورنى اشىلماق.
ءۇشىنشى، جۇمىسپەن قامتۋداعى ماڭىزدى باعىتتاردىڭ ءبىرى – پلاتفورمالىق جۇمىسپەن قامتۋدى تانۋ جانە زاڭداستىرۋ.
– ساراپتامالىق مالىمەتتەرگە جۇگىنسەك، قازاقستاندا 500 مىڭعا دەيىن ادام پلاتفورمالىق جۇمىسپەن قامتىلعان. ياعني، ازاماتتار ياندەكس، ۋبەر، ۆولت جانە گلوۆو سياقتى ءتۇرلى ونلاين-پلاتفورمالار ارقىلى جۇمىس ىستەيدى. مۇنداي رەجيم تۇرعىندارعا ىڭعايلى ەكەنى ءسوزسىز. الايدا، ونىڭ باستى كەمشىلىگى – جۇمىسپەن قامتىلعاندار ءۇشىن الەۋمەتتىك كەپىلدىكتىڭ جوقتىعى. ءبىر سوزبەن ايتقاندا، ونداي ازامات جۇمىسسىز قالسا نەمەسە جۇكتىلىگىنە جانە بالالى بولۋىنا بايلانىستى جۇمىسىن توقتاتسا، مەملەكەتتىك الەۋمەتتىك ساقتاندىرۋ قورىنان قاجەتتى الەۋمەتتىك تولەم الا المايدى. وسىعان بايلانىستى، بۇل ازاماتتاردى الەۋمەتتىك قامسىزداندىرۋ جۇيەسىنە تارتۋ ءۇشىن، ونلاين پلاتفورمالاردىڭ نەگىزگى وپەراتورلارىمەن كەزدەسۋلەر وتكىزدىك. ولارمەن بىرگە بيىلعى 1 شىلدەدەن باستاپ قامتۋ سحەمالارىن پيلوتتىق رەجيمدە جۇرگىزۋ تۋرالى شەشىم قابىلدادىق. جۇمىستىڭ ناتيجەسىن جىل سوڭىنا قاراي ۇسىنامىز، – دەدى تامارا دۇيسەنوۆا.
ءتورتىنشى، ازاماتتاردىڭ جەكەلەگەن ساناتتارىن جۇمىسقا ورنالاستىرۋ جانە ءوز ءىسىن اشۋعا مەملەكەتتىك قولداۋ كورسەتۋ.
پىكىر قالدىرۋ