ءۇش ايدان استام ۋاقىتتان بەرى قاماۋدا وتىرعان وپپوزيسيالىق ساياساتكەر، تىركەلمەگەن دەموكراتيالىق پارتيانىڭ جەتەكشىسى جانبولات مامايعا تاعى ەكى ايىپ تاعىلدى. ول ون جىلعا سوتتالۋى مۇمكىن. بۇل تۋرالى بەلسەندىنىڭ زايىبى جۋرناليست ينگا يمانباي ءمالىم ەتىپ، جانبولات ماماي تەرگەۋ يزولياتورىنان جازعان حات ءماتىنىن جاريالادى.
حاتتا ساياساتكەر بۇگىن وزىنە قىلمىستىق كودەكستىڭ اۋىر ەكى بابى – 272-باپتىڭ 1-تارماعى (جاپپاي ءتارتiپسiزدiكتi ۇيىمداستىرۋ) جانە 274-باپتىڭ 4-تارماعى (كورىنەۋ جالعان اقپارات تاراتۋ) بويىنشا ايىپ تاعىلعانىن بەلگەنىن، ءوزىن قاڭتار كۇندەرى جاپپاي تارتىپسىزدىكتەر ۇيىمداستىرىپ، جالعان ەكەنى بەلگىلى اقپارات تاراتقانى ءۇشىن ايىپتاپ وتىرعانىن ايتادى.
"ەندى بيلىكتىڭ اقىلعا قونىمسىز بۇل تىرلىگىنىڭ قانداي اقىماقتىق ەكەنىن ءتۇسىندىرىپ وتسەم. "ۇيىمداستىردى" دەپ ولار 4 قاڭتار كۇنگى "الماتى ارەنا" ماڭىنداعى الاڭداعى ميتينگتى ايتىپ وتىر. مەن سول الاڭدا ساياسي رەفورمالار جۇرگىزۋدى تالاپ ەتىپ، جينالعان جۇرتتى رەسپۋبليكا الاڭىنا بارۋعا شىقىرىپپىن-مىس. بۇل ايىپتارى تۇككە دە تۇرمايدى. بىرىنشىدەن، مەنىڭ "الماتى ارەنا" ماڭىنداعى الاڭدا سويلەگەن ءسوزىمنىڭ تولىق نۇسقاسى بار. وندا مەن ەشكىمدى ەشقايدا بارۋعا شاقىرماعانىم انىق ەستىلىپ تۇر. كەرىسىنشە، ءبارىنىڭ سول جەردە تۇرىپ، ەشتەڭەنى بۇلدىرمەي، پوليسيامەن قاقتىعىسقا تۇسپەۋدى وتىنگەنىم جازىلىپ قالعان. بۇل بەينە جازبا الەۋمەتتىك جەلىلەردە جاريالانعان بولاتىن. ونىڭ ۇستىنە، بىرەر مينۋتتاردان كەيىن مەنى جانە باسقا دا بەيبىت قارسىلىق تانىتىپ تۇرعان ءبىراز ادامدى پوليسيا ۇستاپ اكەتكەن ەدى. مەن ەشكىمدى الاڭعا باستاپ اپارعام جوق، ويتكەنى ول كەزدە مەن ول جەردە بولعام جوق. ەكىنشىدەن، مەن جالعىز ءوزىم جاپپاي تارتىپسىزدىكتەردى قالاي ۇيىمداستىرادى ەكەم؟ ماعان باعىنعان "توپ" قايدا؟ ولار كىمدەر؟ "ۇيىمنىڭ" انىق تا ءدال ەسەپتەلگەن جوسپارى قايدا؟ الدە مەن جالعىز ءوزىم قۇقىق قورعاۋشى ورگانداردىڭ مىڭداعان قىزمەتكەرلەرىن بۇزىپ، جارىپ، تاپتاپ وتە شىعاتىن قازاقتىڭ "رەمبوسىمىن" با؟ "وتىرىك ەكەنى بەلگىلى جالعان اقپارات" تاراتتى دەپ، بۇلار مەنىڭ جاڭاوزەندە 10 مىڭ ادام الاڭدا تۇر دەگەن ءسوزىمدى الىپ وتىر. بۇل باق-تا جاريالانعان اشىق تا ناقتى اقپارات. بولماسا، پروكۋراتۋرا "ونداعىلاردىڭ ءبارىن ساناپ شىقتىق، الاڭدا تەك 9999 ادام عانا تۇردى" دەپ، مەنىڭ ايتقانىمدى جوققا شىعارعىسى كەلە مە؟ لوگيكا قايدا؟ پروكۋراتۋرانىڭ لوگيكاسىنا سالساق، مۇنداي ايىپتى پرەزيدەنت توقايەۆقا دا تاعۋعا بولادى ەمەس پە؟ ويتكەنى، ول قاڭتار كۇندەرى تەك ءبىر الماتىعا عانا 20 مىڭ تەررورشى شابۋىل جاسادى دەپ مالىمدەگەن بولاتىن. قايدا ول تەررورشىلار؟ ال، 5 ماۋسىم كۇنى توقايەۆ ەلدىڭ الدىندا 20 مىڭ تەررورشىنىڭ بولماعانىن مويىندادى. ەندى، پروكۋراتۋرا وسى فاكتى بويىنشا قىلمىستىق ءىس قوزعاۋى ءتيىس قوي؟" دەيدى بەلسەندى حاتىندا.
ول وزىنە تاڭىپ وتىرعان قىلمىستىق ءىس وپپوزياسياداعى تۇلعانى قۋدالاۋ ءۇشىن اشىلعان ساياسي استارى بار ءىس دەپ سانايتىنىنىن جاريا تۇردە مالىمدەيتىنىن، بۇل – بيلىكتىڭ تاۋەلسىز ساياسي كۇشتەردەن ولەردەي قورقاتىنىن كورسەتەدى ءمالىم ەتتى.
"مەنى نازاربايەۆ بيلىگى تۇسىندا قۋدالاۋعا ۇشىراتىپ، تۇرمەگە دە قاماعان. سول ءۇردىس توقايەۆ كەزىندە دە جالعاسىپ جاتىر. ەگەر دە، پرەزيدەنت توقايەۆ نازاربايەۆتىڭ جولىمەن جۇرە بەرەمىن دەپ ويلاسا، قاتتى قاتەلەسەدى. بۇل جولدا، ديكتاتور نازاربايەۆ سىندى، ونىڭ دا ساياسي عۇمىرى ءساتسىز اياقتالىپ، كۇيرەيتىنىن ەسكەرتەمىن. سوڭعى رەفەرەندۋمدا، رەسمي دەرەكتەر بويىنشا عانا، 1،5 ملن ازامات توقايەۆتىڭ ۇسىنىستارىن قولدامايتىندارىن ءبىلدىردى. بۇل نەنى بىلدىرەدى؟ بيلىكتىڭ سۇيكىمى كەتكەنىن بىلدىرسە كەرەك. بيلىككە ەلدىڭ سەنىمى جوق ەكەنىن بىلدىرسە كەرەك. ال، ءوز وپپونەنتتەرىن ساياسي قۋعىنعا ۇشىراتقانى بيلىككە سەنىم رەيتينگىن كوتەرمەسى انىق. مەن تاپ كەلگەن قيىندىقتار مەن بيلىكتىڭ رەپرەسسياسى الدىندا باسىمدى يمەكشى ەمەسپىن. كۇرەسىمدى جالعاستىرا بەرەمىن جانە ءوزىمنىڭ شىندىعىمدى سوڭىنا دەيىن دالەلدەپ شىعامىن" دەيدى وپپوزيسيالىق ساياساتكەر.
جانبولات ماماي اقپان ايىنان بەرى قاماۋدا وتىر. ول الدىمەن قاڭتار وقيعاسى قۇرباندارىنا ارنالعان قارالى ميتينگتى ۇيىمداستىرعانى ءۇشىن 15 تاۋلىككە، ارتىنشا ەكى قىلمىستىق ءىس بويىنشا ەكى ايعا قاماۋعا الىنعان. وعان "قارابەت" دەگەنى ءۇشىن قۇقىققورعاۋ ورگانى قىزمەتكەرىن قورلادى، نەسيە امنيستياسىنا بايلانىستى "جالعان اقپارات" تاراتتى دەگەن ايىپ تاعىلىپ وتىر. جانبولات مامايدىڭ جاقتاستارى مەن ادام قۇقىعى سالاسىنداعى بەدەلدى حالىقارالىق Human Rights Watch جانە Amnesty International ۇيىمدارى بەلسەندىنى قۋدالاۋدىڭ ساياسي استارى بار ەكەنىن ايتادى.
پىكىر قالدىرۋ