قازاقستاندا وقۋشى قىزدارعا ورامال تاعۋعا رۇحسات بەرۋ ماسەلەسى قايتادان تالقى تاقىرىبىنا اينالدى. اڭگىمە ءبىلىم جانە عىلىم ءمينيسترى اسحات ايماعامبەتوۆتىڭ ەلدەگى باسىلىمداردىڭ بىرىنە بەرگەن سۇحباتىنداعى ءبىراۋىز سوزىنەن باستالدى.

ول جەردە جۋرناليست مينيستردەن "مەكتەپتە ورامال تاعۋعا رۇحسات بەرۋ ماسەلەسى قايتا قارالا ما؟" دەپ سۇرايدى.

مينيستر قازاقستان زايىرلى مەملەكەت ەكەنىن، مەكتەپ فورماسىنا بايلانىستى ارنايى بۇيرىق بارىن ايتىپ، الايدا كەز كەلگەن توپتىڭ ءبىلىم الۋىن ماڭىزدى دەپ سانايتىنىن اتاپ ءوتتى.

– ورامال تاعا المايتىنىنا بايلانىستى اتا-انالارى مەكتەپكە جىبەرمەيتىن قىزدار قاشىقتان وقۋعا ءماجبۇر. ال مۇنىڭ تەرىس اسەرى بولادى. ءبىز ينكليۋزيۆتى قوعام قۇرۋعا ءتيىسپىز. سوندىقتان بۇل – نازار اۋدارۋعا تۇرارلىق ماسەلە، – دەدى مينيستر.

ماسەلە قوعامدى قاق جاردى. مەكتەپتە ورامال تاعۋعا رۇحسات بەرۋگە قارسى شىعىپ جاتقاندار قازاقستان زايىرلى قوعام بولعاندىقتان، مەكتەپ فورماسى ءبىرىڭعاي بولۋى كەرەكتىگىن، بۇگىن يسلام ءدىنىن ۇستانۋشىلاردىڭ قىزدارىنا ورامال تاعۋعا رۇحسات بەرىلسە، ەرتەڭ وزگە ءدىن مەن اعىم وكىلدەرى ءوز تالابىن قويىپ شىعۋى مۇمكىن ەكەنىن ايتادى. ورامالعا رۇحسات بەرىلۋىن قولدايتىندار ەل اتا زاڭى بويىنشا ەشكىمدى تەگىنە، الەۋمەتتىك، لاۋازىمدىق جانە مۇلىكتىك جاعدايىنا، جىنىسىنا، ناسىلىنە، ۇلتىنا، تىلىنە، دىنگە كوزقاراسىنا، نانىمىنا، تۇرعىلىقتى جەرىنە كەمسىتۋگە بولمايتىنىن باسشىلىققا الىپ، مەكتەپتە ورامال تاعۋعا رۇحسات بەرمەۋ ادام قۇقىعىن شەكتەۋ دەپ ەسەپتەيدى.

ماسەلەگە بايلانىستى حالىق facebook جەلىسىندە ويىن قالاي ءبىلدىرىپ جاتقانىنا شولۋ جاساپ، ءبىرقاتارىن ۇسىنۋدى ءجون كوردىك. ماسەلەگە كوزقاراس ءبىرجاقتى بولىپ قالماۋى ءۇشىن تومەندە ءارتۇرلى پىكىردەگى ادامداردىڭ ويى بەرىلگەن.

اسىلتاي تاسبولات: ورامال دەسە، ءدىن ادامنىڭ جۇرەگىندە دەپ قۋىپ كەتۋدى تۇسىنبەي وتەتىن شىعارمىن. ليبەرال، دەموكرات ادام ەشقاشان ادامنىڭ ءدىني سەنىم بوستاندىعىنا قول سۇقپاۋى ءتيىس. ءدىن جۇرەكتەن بولەك، ناقتى اتريبۋتتارمەن كورىنىس تابادى. ورامال تاعۋ ءدىننىڭ الەۋمەتتىك بەينەسى، سونى تالقىلاپ جاتىرمىز. ال جۇرەك ەزوتەريكالىق قابات، ابستراكسيا. ورامال تاعۋعا قاتىستى تاقىرىپقا اكەپ تىعۋعا دىم كەلمەيدى سونى. زايىرلى مەملەكەت دەگەن - اتەيستىك يدەولوگيا ۇستەمدىك قۇراتىن ساياسي قۇرىلىم ەمەس. ءدىن ۇستانۋشىلارعا دەگەن جەككورىنىش شكالاسى تىم جوعارى ەكەن قوعامدا. ايماعامبەتوۆ دۇرىس دۇنيەنى تالقىعا سالىپ وتىر. ورامال تاققان مەن ساقال قويعاننىڭ بارلىعى ەكسترەميست ياكي تەرروريست ەمەس قوي. باتىس ەلدەرى سوڭعى كەزدە حيدجابتى ادام قۇقىعىنا، ال ءپارانجانى قاۋىپسىزدىك ماسەلەسىنە جاتقىزۋعا كەلىسكەندەي شەشىمدەر ىزدەپ جاتىر. الگى ايتقانى ءدوپ كەلە بەرمەيتىن فۋتۋرولوگ فۋكۋيامانىڭ ماقالاسىن وقىپ ەدىم بىلتىر، سونداي ورتا جول ىزدەپ جاتىر ەكەن ەۋروپارلامەنت. ميگرانتتار كوپ قوي ەندى. ال بريتانيا ءتىپتى ارنايى كابينكالاردا، ايەل سەكيۋريتيدى كىرگىزىپ قارايدى ەكەن پاسپورتى مەن ءجۇزىن. ورامال تاققان وقۋشىلاردان پوتەنسيال تەرروريست كورۋ ءقاۋىپتى تەندەنسيا. ينكليۋزيۆ قوعام ولاي بولمايدى.

Michael Sherimbek: ورامال ماسەلەسى بۇگىن عانا بولىپ وتىرعان جوق قوي. ەگەر ءقازىر شەشىلمەسە ءارى قاراي ۇلكەن ماسەلەگە اينالادى. 6 جاسار قىزدى ورامالمەن قاپتاپ مەكتەپكە جىبەرۋدىڭ لوگيكاسىن ۇعىنا الماي-اق قويدىم. ءدال سول قىزدارىن مەكتەپكە ورامالمەن جىبەرەتىن اتا-انالاردىڭ دەنى - بارىپ تۇرعان ەگويست ءھام بالالارىن ەش ويلاعىسى كەلمەيتىن ادامدار دەپ ەسەپتەيمىن. ءوزىڭىز ويلاپ قاراڭىز، بۇكىل مەكتەپتەگى قىزداردىڭ شاشى اشىق جۇرەدى. ولاردىڭ كوبى ءدىني ماسەلەلەردەن حابارى دا جوق. سىنىپقا باسى ورانعان وزدەرىمەن قاتار قىز كىرىپ كەلەدى. نە ىستەيدى ول بالالار؟ ارينە، ول ورامالدى قىزدان الىس جۇرەتىن بولادى. ونىڭ ۇستىنە ۇيىنە بارىپ بولعان جاعدايدى ايتسا، كادىمگى قىزداردىڭ اكە-شەشەلەرى "ويباي، جولاما وندايلارعا" دەيدى. ناتيجەسىندە، ەندى عانا مەكتەپتە بارعان كىشكەنتاي قىز قوعامنان وقشاۋلانىپ، ءوزىن بوتەن سەزىنىپ دەپرەسسياعا ۇشىراي باستايدى. ال، ول كەزەڭ بالالاردىڭ قالىپتاسۋ كەزەڭى ەكەنىن ەسكەرسەك، الگى قىزدىڭ بولاشاعى قانداي بولارىن ويلاي بەرىڭىز. ول قىز بولاشاقتا ەشكىممەن ارالاسپايتىن بولادى. ەسەيگەن كەزدە قوعام ونى قابىلداعانىمەن، بالانىڭ ساناسىندا قالىپ كەتكەن كومپلەكس پەن رەنىشتىڭ سوڭى نەگە اپاراتىنىن ەسەپتەي كورىڭىز.