كونستيتۋسيادان ەلباسى مارتەبەسى تۋرالى نورمانى الىپ تاستاۋدى كوزدەيتىن زاڭ وسى جىلدىڭ سوڭىنا دەيىن قابىلدانادى. بۇل تۋرالى ءماجىلىس سپيكەرى ەرلان قوشانوۆ مالىمدەدى، دەپ حابارلادى Sputnik قازاقستان سايتى.
ءماجىلىس كۋلۋارىندا جۋرناليستەر سپيكەردەن تۇڭعىش پرەزيدەنت نۇرسۇلتان نازاربايەۆتىڭ مارتەبەسىنە قاتىستى رەفەرەندۋمدا ماقۇلدانعان تۇزەتۋلەر قاشان قابىلداناتىنىن سۇراعان.
"ءبىز كۇزدە قاراستىرۋعا كىرىسەمىز. جىل سوڭىنا دەيىن قابىلداۋىمىز كەرەك. پرەزيدەنت ءبىزدىڭ الدىمىزعا وسىنداي مىندەت قويدى"، - دەدى قوشانوۆ.
ايتۋىنشا، ادىلەت مينيسترلىگىندە كونستيتۋسيالىق جانە باسقا دا زاڭدارعا وزگەرىستەر ەنگىزۋ بويىنشا جۇمىس توبى قۇرىلعان. ماسەلە وسى جۇمىس توبى اياسىندا قارالادى. زاڭ جوبالارى ازىرگە ماجىلىسكە تۇسپەگەن.
5 ماۋسىمدا كونستيتۋسيالىق تۇزەتۋلەر بويىنشا وتكەن بۇكىلحالىقتىق رەفەرەندۋم ناتيجەسىنە ساي، ەلدىڭ نەگىزگى زاڭىنان "تۇڭعىش پرەزيدەنت تۋرالى" زاڭدى جويۋ ارقىلى تۇڭعىش پرەزيدەنت نۇرسۇلتان نازاربايەۆتىڭ مارتەبەسى تۋرالى ەرەجەلەر الىنىپ تاستالادى.
سونداي-اق قابىلدانعان تۇزەتۋلەرگە سايكەس كونستيتۋسيانىڭ 42-بابىنان تۇڭعىش پرەزيدەنتكە مەملەكەت باسشىسى لاۋازىمىنا قاتارىنان ەكى رەتتەن ارتىق سايلانۋ قۇقىعىن بەرەتىن ەرەجە كۇشىن جويادى. سونىمەن قاتار 46-باپتان تۇڭعىش پرەزيدەنتتىڭ مارتەبەسى مەن وكىلەتتىگى كونستيتۋسيامەن جانە ءتيىستى كونستيتۋسيالىق زاڭمەن ايقىندالاتىنى تۋرالى تارماق جويىلادى.
پىكىر قالدىرۋ