تەرگەۋ يزولياتورىندا قاماۋدا وتىرعان وپپوزيسيالىق بەلسەندى ەرمەك نارىمبايەۆ ازاپتاۋعا ۇشىراعانىن، وزىنە قاتىستى قولدانىلعان زاڭسىز ارەكەتتەرگە نارازىلىق رەتىندە اشتىق جاريالاعانىن ءمالىم ەتتى. بۇل تۋرالى نارىمبايەۆتىڭ تەرگەۋ يزولياتورىنان جازعان حاتىندا ايتىلادى. حات ونىڭ facebook پاراقشاسىندا جاريالاندى.

سوزىنشە، ونى 21 ماۋسىم كۇنى ساعات 22:00-دە بىرنەشە جەدەل ۋاكىل ءتىنتىپ، ەكىنشى ارەكەتتەن كەيىن قالتاسىنا SIM كارتا سالىپ جىبەرىپ، ءتىنتۋ كەزىندە تاۋىپ العانداي بولعان. "بۇنىڭ ءبارى جەدەل ۋاكىلدەردىڭ ۆيدەوسىندا بار" دەگەن بەلسەندى وسى جاعدايدان كەيىن تارتىپتىك يزولياتورعا قامالعان. ول "SIM كارتادا ساۋساق ىزدەرىنىڭ جوعىن جەدەل ۋاكىلدەردىڭ ءوزى ايتتى، "سيمكا" ەشكىمنىڭ اتىنا تىركەلمەگەن بولىپ شىقتى" دەپ وتىر. نارىمبايەۆ وسى جاعدايدان كەيىن اشتىق جاريالاعان.

ول جاريالاعان اشتىعىن توقتاتۋ ءۇشىن تەرگەۋ يزولياتورىنىڭ قىزمەتكەرلەرى كوزى ناشار كورەتىنىنە قاراماستان كوزىلدىرىگىن، كىتاپ، قالام، جالعىز تاماعى بولعان سۋىن الىپ قويىپ، كراننىڭ سۋىپ جاۋىپ تاستاعانىن ايتادى.

"وفيسەرلەر مەن اسكەري قىزمەتشىلەردىڭ ءبىر توبى توسەكتەن ماتراستى، جاستىقتى الىپ، توسەكتى جاۋىپ، مەنى اش كۇيى ۇيىقتاۋعا، بەتون ەدەنگە جاتۋعا ءماجبۇر ەتتى. جەدەل ۋاكىل ءبولىمىنىڭ ءۇش وفيسەرى (ءبولىم باستىعى نۇرلان قۇرمانعالي ۇلى، ەلدوس، مۇرات ميرحان ۇلى) مازاق ەتتى، تۇرعىزىپ الىپ، ءۇش بۇرىش سەكىلدى ەتىپ مەنى بىر-بىرىنە يتەردى. قۇلاعىما تاقاپ داۋسى زورايعان مۋزىكامەن قىسىم جاساۋ ارقىلى ارگەسسيۆتى ارەكەتتەرگە ارانداتۋعا تىرىستى" دەيدى.

ول ازاپتاۋ ارەكەتتەرى پروكۋراتۋراعا ارىزدانعاننان كەيىن دە جالعاسقانىن جەتكىزدى.

"مەن ار-نامىسىمدى، قادىر-قاسيەتىمدى كەمسىتەتىن، قۇقىعىمدى بۇزاتىن پسيحيكالىق جانە فيزيكالىق زورلىق-زومبىلىققا ۇشىرادىم، وسىلايشا ازاپتاۋعا جانە قاتىگەز قارىم-قاتىناسقا جانە مەنىڭ قادىر-قاسيەتىمدى قورلايتىن ىس-ارەكەتتەرگە جول بەرمەۋ تۋرالى كونستيتۋسيالىق قۇقىعىم بۇزىلدى. باياندالعاننىڭ نەگىزىندە ماعان قاتىستى زورلىق-زومبىلىق جاساعان كىنالىلەردى جاۋاپقا تارتۋ تۋرالى قۇزىرەتتى ورگاندارعا شاعىم جىبەرۋ ءۇشىن مەنىڭ ءوتىنىشىمدى قابىلداۋدى سۇرايمىن" دەلىنگەن نارىمبايەۆ جازباسىندا. 

ەرمەك نارىمبايەۆ العاش 2015 جىلعى 12 قازاندا ۇستالعان. وعان قىلمىستىق كودەكستىڭ 174-بابى (الەۋمەتتىك جەلىدە ۇلتتىق ار-نامىستى قورلاۋ، ۇلتارازدىقتى قوزدىرۋ باعىتىنداعى اقپاراتتى تاراتۋ) بويىنشا ايىپ تاعىلعان. بەلسەندى سەرىكجان مامبەتالين ەكەۋى ارتىنشا ارەكەتىنە "وكىنەتىنى" تۋرالى حات جازعان. ەرمەك نارىمباي تەرگەۋ يزولياتورىندا ءبىر ايدان استام ۋاقىت اشتىق جاريالاپ، 2016 جىلعى 22 اقپاندا سوت ونى ءۇي قاماققا اۋىستىرۋ تۋرالى شەشىم شىعارعان. كەيىن اپەللياسيا سوتى ونىڭ جازاسىن 3 جىل مەرزىمگە ەركىندىگىن شەكتەۋ جازاسىنا اۋىستىرعان. 2016 جىلعى شىلدەدە ەرمەك نارىمباي قۇزىرلى ورگاندارعا ەسكەرتپەستەن ۋكرايناعا كەتىپ قالعان. ول سودان بەرى ۋكراينادا تۇرىپ كەلدى. 

بەلسەندى قاڭتار وقيعاسىنان كەيىن اقپاندا بيلىكپەن ديالوگ ورناتقىسى كەلەتىنىن ايتىپ، ەلگە ورالعان بەتتە الماتى اۋەجايىندا قاماۋعا الىنعان.