قازاقستاندا ونلاين قۇرباندىق شالۋعا مۇمكىندىك بەرەتىن qurban2022.kz سايتى ىسكە قوسىلدى. بيىل ەلىمىزدە قۇربان شالۋ ءراسىمى وفلاين جانە ونلاين فورماتتا وتەدى. قۇربان ايت 9 ماۋسىمدا باستالادى.
"ءدىني باسقارما ەل ازاماتتارىنا، اسىرەسە قالا تۇرعىندارىنا قولايلى جاعداي جاساۋ ماقساتىندا قۇربان شالۋ ءراسىمىن قاشىقتان وتكىزۋگە ارنالعان qurban2022.kz سايتىن ىسكە قوستى"، - دەپ حابارلادى قازاقستان مۇسىلماندارى ءدىني باسقارماسى.
ونلاين قۇربان شالعىسى كەلەتىندەر سايت ارقىلى قۇرباندىق مالىن تاڭداپ، كورسەتىلگەن رەكۆيزيتكە قاجەتتى اقشانى اۋدارا الادى. قوي مەن ەشكىنى ءبىر ادام، ال ءىرى قارا مەن تۇيەنى ءبىر نەمەسە 7 ادام بىرىگىپ شالسا بولادى.
بۇدان كەيىن تولەم بارىسىندا حابارلاماعا تاپسىرىس ءنومىرى مەن قۇرباندىق شالۋشىنىڭ ءاتى-جونىن جازۋ مىندەتتى. قۇرباندىق شالىنعان سوڭ ونىڭ فوتو جانە بەينە ەسەبى تاپسىرىس بەرۋشى كورسەتكەن WhatsApp نومىرگە جىبەرىلەدى.
قۇرباندىق ەتى مۇقتاج جاندارعا تاراتىلادى. سول سەبەپتى مۇقتاج جاندار وسى سايتتا ەتتى الۋعا ءوتىنىش بەرۋگە ءتيىس.
Qurban2022.kz سايتىندا نۇر-سۇلتان تۇرعىندارى ءۇشىن قۇرباندىققا شالىناتىن ءبىر قويدىڭ باعاسى 70 مىڭ تەڭگە. ال ءىرى قارا ءبىر ادامعا 455 مىڭ تەڭگەگە شىعادى. ەگەر جەتى ادام بىرىگىپ سويسا، اربىرەۋى 65 مىڭ تەڭگەدەن تولەۋى كەرەك.
الماتى قالاسىندا قوي – 75 مىڭ تەڭگە، ەشكى – 47 مىڭ تەڭگە، ءىرى قارا – 392 مىڭ تەڭگە تۇرادى.
سايتتا كورسەتىلگەن مال باعاسىنا قاساپشىنىڭ ەڭبەكاقىسى كىرەدى. قالعان قىزمەت تۇرلەرى (مالدى بولشەكتەپ سويۋ، پاكەتتەرگە سالىپ، مۇقتاجدارعا جەتكىزۋ) – تەگىن. قۇربان ايت ءۇش كۇنگە سوزىلادى. بيىل قۇربان ايتتىڭ ءبىرىنشى كۇنى سەنبى، 9 شىلدەگە ءتۇسىپ تۇر.
قازاقستاندا قۇربان ايتتىڭ العاشقى كۇنى دەمالىس بولىپ سانالادى. ءبىراق بۇل ۇلتتىق نەمەسە مەملەكەتتىك مەرەكە بولماعاندىقتان، دەمالىس كۇنى اۋىستىرىلمايدى. سول سەبەپتى قازاقستاندىقتارعا وسى جىلى قوسىمشا دەمالىس بەرىلمەيدى.
پىكىر قالدىرۋ