سوڭعى جىلدارى حالىقتىڭ تابىسى بىرتىندەپ ءوستى. بىلتىر بۇل ءوسىم 5 پايىز شاماسىندا بولدى. ءبىراق، الماتى، اتىراۋ، قىزىلوردا، ماڭعىستاۋ جانە تۇركىستان وبلىستارىندا جۇرتتىڭ تابىسى ورتاشا رەسپۋبليكالىق دەڭگەيگە جەتپەيدى. بۇل كورسەتكىش الماتى جانە شىمكەنت قالالارىندا دا تومەن. ال، قىزىلوردا وبلىسىندا حالىقتىڭ تابىسى ءتىپتى ازايىپ كەتتى. بيىل مامىر ايىندا ازاماتتاردىڭ ناقتى تابىسىنىڭ كورسەتكىشى مينۋس 2،9 پايىز بولدى. مۇنداي قۇلدىراۋ كوپتەن بەرى بولعان ەمەس. بۇلاي دەپ پرەزيدەنت ق.توقايەۆ ۇكىمەتتىڭ كەڭەيتىلگەن وتىرىسىندا ايتتى.

مەملەكەت باسشىسىنىڭ سوزىنشە، حالىق تابىسىن ارتتىرۋ باعدارلامالارىنان جۇرتقا ءتيىپ جاتقان پايدا شامالى.

ول اكىمدەرگە جىل سايىن ءاربىر 10 مىڭ تۇرعىنعا 100 جاڭا جۇمىس ورنىن اشۋدى تاپسىردى.

سونداي-اق توقايەۆ رەتسىز جۇرگىزىلگەن كوشى-قون ساياساتىنىڭ سالدارىنان كەي وڭىرلەردە جۇمىس تابۋ ماسەلەسى وتكىر پروبلەماعا اينالىپ وتىرعانىن دەتكىزدى.

– حالىق سانى كوبەيگەن سايىن تۇراقتى جۇمىس ورىندارى اشىلۋى كەرەك. ءبىراق، ماڭعىستاۋ وبلىسىندا وسى ماسەلە ەسكەرىلمەگەن. مۇندا ءجونسىز جۇرگىزىلگەن كوشى-قون ساياساتىنىڭ سالدارىنان كۇردەلى احۋال قالىپتاسىپ وتىر. تۇرعىنداردىڭ سانى كوبەيگەنىمەن، الەۋمەتتىك ينفراقۇرىلىم سالىنعان جوق. جۇمىس ورىندارى اشىلمادى. تۇرمىس ساپاسى تومەندەپ كەتتى. جۇرت "قازمۇنايگاز" كومپانياسىنا جۇمىسقا تۇرعىزۋدى، جوعارى جالاقى بەرۋدى تالاپ ەتۋدە. اشىعىن ايتقاندا، جاڭاوزەندەگى كەن ورىندارىنىڭ كوپشىلىگى سارقىلىپ بارادى. بۇل جاعداي بارشاعا ءمالىم. سوڭعى 15 جىلدا وسى وڭىردە مۇناي ءوندىرۋ ءىسى 30 پايىزعا ازايعان. سوعان قاراماستان، جۇمىسشىلار سانى 50 پايىزعا كوبەيدى. ەڭبەكاقى تولەۋ قورى 10 ەسە ارتتى. ال، كوپ جالاقى تولەنەتىن ءۇش ءوڭىردىڭ ءبىرى – وسى ماڭعىستاۋ ولكەسى. ناقتى ايتساق، جاڭاوزەن ورتاشا ەڭبەكاقىنىڭ ەڭ جوعارى دەڭگەيى بويىنشا كوش باستاپ تۇر. ۇكىمەت جاڭاوزەندى دامىتۋ ءۇشىن ارنايى جوسپار قابىلدادى. رەسپۋبليكالىق بيۋدجەتتەن قوماقتى قارجى ءبولىپ، سالىقتى ازايتىپ وتىر. وسىنداي تىكەلەي قولداۋ شارالارى ەلىمىزدىڭ باسقا وبلىستارىنىڭ ەسەبىنەن جاسالۋدا. جۇرتتىڭ بارىنە مۇناي-گاز سالاسىنان جۇمىس تاۋىپ بەرۋ مۇمكىن ەمەس. مۇنى اشىق ايتۋىمىز كەرەك، –  دەگەن پرەزيدەنت ۇكىمەتكە ىشكى ەكونوميكالىق رەسۋرستاردى جۇمىلدىراتىن جاڭا تاسىلدەر ازىرلەۋدى تاپسىرىپ، بۇل رەتتە، حالىقتى وزگە ايماقتارعا كوشىرۋ باعدارلاماسىن تۇبەگەيلى قايتا قاراۋ كەرەكتىگىنە نازار اۋداردى.

– ءبىز تاريحي وتانىنا ورالعان قانداستاردى تولىق قولدايمىز. ءبىراق، تەك ماڭعىستاۋ وڭىرىمەن شەكتەلۋگە بولمايدى. باسقا وبلىستارعا، سونىڭ ىشىندە ءوندىرىسى دامىعان ايماقتارعا قونىستانۋعا بولادى. ءبىز قاجەتتى جاعدايدى جاساۋعا دايىنبىز، – دەدى ول.