الماتىداعى اباي الاڭىندا «TARTYL FEST – 2022» تۋرنيكەتىندە تارتىلۋ بويىنشا جارىس وتۋدە. فەستيۆال ەلىمىزدىڭ بارلىق وڭىرلەرىندە 10 شىلدە مەن 6 قىركۇيەك ارالىعىندا وتەدى. شارانى ۇيىمداستىرۋشى قازاقستان رەسپۋبليكاسى پرەزيدەنتىنىڭ جانىنداعى «دارا» تالانتتاردى قولداۋ قورى.

قازىرگى ۋاقىتتا الماتىدا 500-دەن استام اۋەسقوي-سپورتشىلار تىركەلگەن. قاتىسۋشىلار سالماعى مەن جاسىنا بايلانىستى توعىز سانات بويىنشا ونەر كورسەتەدى.  جەڭىمپازدار 17 شىلدە كۇنى كەشكە فەستيۆال اياقتالعاننان كەيىن انىقتالادى.

فەستيۆال قونايەۆ قالاسىندا باستالىپ، تالدىقورعاندا جالعاستى. الماتى جارىس وتكەن ءۇشىنشى قالا بولدى. قازاقستاننىڭ 20 قالاسىنىڭ جەڭىمپازدارى (9 سانات بويىنشا) 8 قىركۇيەكتە نۇر-سۇلتان قالاسىندا وتەتىن گراند-فينالعا قاتىسادى. ءار قالاداعى جۇلدە قورى: 1 ورىن - 200 000 تەڭگە؛ 2 ورىن - 100 000 تەڭگە؛ 3 ورىن - 50 000 تەڭگە. گراند-فينالدىڭ جۇلدە قورى: 1 ورىن - 3 ميلليون تەڭگە؛ 2 ورىن - 2 ميلليون تەڭگە؛ 3 ورىن-1 ميلليون تەڭگە. گراند-فينال چەمپيوندارى Street Workout بويىنشا الەم چەمپيوناتىنا قاتىسۋ مۇمكىندىگىنە يە بولادى.