اقش ادىلەت دەپارتامەنتىنىڭ وكىلدەرى قىلمىستىق اكتيۆتەردى ىزدەۋگە جانە اقش-تان قازاقستانعا قايتارۋعا قولداۋ كورسەتۋگە دايىن ەكەنىن مالەمدەدى. بۇل تۋرالى باس پروكۋروردىڭ ءبىرىنشى ورىنباسارى تيمۋر تاشىمبايەۆ باستاعان قازاقستان رەسپۋبليكاسى باس پروكۋراتۋراسىنىڭ دەلەگاسياسىنىڭ امەريكا قۇراما شتاتتارىنا جاساعان جۇمىس ساپارى بارىسىندا بەلگىلى بولدى.

باس پروكۋراتۋرا باسپا ءسوز قىزمەتىنىڭ حابارلاۋىنشا، قازاقستان دەلەگاسياسى ساپار بارىسىندا اقش ادىلەت دەپارتامەنتىنىڭ باسشىلىعىمەن، فەدەرەلدىق تەرگەۋ بيۋروسى جانە دۇنيەجۇزىلىك بانك وكىلدەرىمەن ءبىرقاتار كەزدەسۋلەر وتكىزگەن.

"تاراپتار ناقتى قىلمىستىق ىستەر بويىنشا ىنتىماقتاستىقتى نىعايتۋ، سۇراۋ سالۋلاردى ەلەكتروندىق فورماتتا بەرۋ، كيبەرقىلمىسپەن كۇرەس سالاسىندا تاجىريبە الماسۋ، سوتتالعانداردى ۇستاپ بەرۋ جانە بەرۋ تۋرالى شارتتار جاساسۋ ماسەلەلەرىن تالقىلادى. اقش ادىلەت دەپارتامەنتىنىڭ وكىلدەرى قىلمىستىق اكتيۆتەردى ىزدەۋگە جانە اقش-تان قازاقستانعا قايتارۋعا قولداۋ كورسەتۋگە دايىن ەكەندەرىنە سەندىردى. تاراپتار بىرلەسكەن كۇش-جىگەرمەن عانا ترانسۇلتتىق ۇيىمداسقان قىلمىسقا جانە قىلمىستىق كىرىستەردى جىلىستاتۋعا قارسى ءتيىمدى كۇرەس جۇرگىزۋگە بولادى دەگەن ءوزارا پىكىرگە كەلدى.

بۇدان بولەك، قازاقستان دەلەگاسياسى دۇنيەجۇزىلىك بانكتىڭ «StAR Initiative» (ۇرلانعان اكتيۆتەردى قايتارۋ باستاماسى) جوباسىنىڭ وكىلدەرىمەن كەزدەستى. دۇنيەجۇزىلىك بانكپەن قازاقستاننىڭ شەتەلگە، ونىڭ ىشىندە وفشورلىق يۋريسديكسياعا شىعارىلعان قىلمىستىق جولمەن تابىلعان اكتيۆتەردى قايتارۋ بويىنشا كۇش-جىگەرىن قولداۋ جانە ىنتىماقتاستىقتىڭ كورسەتىلگەن باعىتى بويىنشا پروكۋرورلار مەن تەرگەۋشىلەر ءۇشىن ترەنينگتەر وتكىزۋ ماسەلەلەرى تالقىلاندى. بانك وكىلدەرى قازاقستاندىق تاراپتىڭ بۇل باستامالارىن قولدادى" دەلىنگەن اقپاراتتىق حابارلامادا.

بۇعان دەيىن سىبايلاس جەمقورلىققا قارسى ءىس-قيمىل اگەنتتىگى ەۋرووداق قازاقستاننان شىعارىلعان اكتيۆتەردى قايتارۋعا كومەكتەسۋگە دايىن ەكەنىن ءمالىم ەتكەن.