سىرتقى ىستەر مينيسترلىگى قازاقستان تايۆان ارالىن جۇڭگو حالىق رەسپۋبليكاسىنىڭ اجىراماس ءبىر بولىگى رەتىندە قارايتىنىن ءمالىم ەتتى.
"قازاقستان رەسپۋبليكاسى "ءبىر جۇڭگو" قاعيداتىن قولدايدى جانە تايۆاندى جۇڭگو حالىق رەسپۋبليكاسى اۋماعىنىڭ اجىراماس بولىگى دەپ سانايدى. قازاقستان حالىقارالىق قۇقىقتىڭ قولدانىستاعى نورمالارىن جانە بىرىككەن ۇلتتار ۇيىمى جارعىسىن ساقتاۋدى، اتاپ ايتقاندا وسى ماسەلەدە بۇۇ باس اسسامبلەياسىنىڭ 1971 جىلعى №2758 قارارىن ۇستانۋدى جاقتايدى" دەلىنگەن ق ر ءسىم رەسمي وكىلى ايبەك سمادياروۆتىڭ تايۆان بويىنشا تۇسىنىكتەمەسىندە.
جۇڭگو تايۆان ارالىن ءوزىنىڭ پروۆينسياسى دەپ سانايدى. ال تايۆان ارالى سوڭعى بىرنەشە جىلدان بەرى جۇڭگو قۇرامىنان شىعىپ، ءوز الدىنا تاۋەلسىز مەملەكەت بولۋدى سۇراپ كەلەدى.
2 تامىزدا تايۆانعا بارعان اقش وكىلدەر پالاتاسىنىڭ سپيكەرى نەنسي پەلوسي اقش-تىڭ "ءبىر جۇڭگو" ساياساتىنا قۇرمەتپەن قارايتىنىن، الايدا تايۆانداعى بوستاندىق پەن قاۋىپسىزدىككە باسىمدىق بەرىلۋىن قولدايتىنىن ايتقان بولاتىن.
پىكىر قالدىرۋ