بەلگىلى جۋرناليست قاينار ولجاي ەل بيلىگى رەسەي ازاماتتارىنا جەكە سايكەستەندىرۋ ءنومىرىن (جسن) وڭدى-سولدى بەرىپ جاتقانىنىڭ استارىندا شەتەلدىكتەرگە وزدەرىنىڭ جىلجىمايتىن مۇلكىن وتكىزۋ پيعىلى جاتقان بولۋى مۇمكىن دەگەن ماسەلە كوتەردى.
"رەسەيدەن كەلىپ جاتقاندارعا نەگە ۋاقىتشا تىركەلۋ، جسن مۇمكىندىگى بەرىلدى؟ وسى سۇراققا مىنانداي ويىمىز بار. ءبىزدىڭ بۇرىن بيلىكتە بولعان، ءقازىر ءباا، تۇركيا جانە باسقا جاقتى ساعالاعان داۋلەتتىلەردىڭ استانا، الماتى جانە باسقا قالالاردا ونداعان كوتتەدج، جۇزدەگەن پاتەرلەرى بولدى. ءبارى ەليتالىق، سوندىقتان ساتىلماي تۇردى. ال رەسەيدەن كىمدەر كەلىپ جاتىر؟ شامامەن، بيزنەسمەن، بۇرىنعى پاراقور شەنەۋنىك جانە قىلمىس الەمىنەن بايىعاندار. جاي ورىستىڭ كوشۋگە ىقىلاسى دا، ءۇي ساتىپ الار مۇمكىندىگى دە جوق. سونىمەن "ەكى ەسەپ — ءبىر قيساپ". ەل ەسىگىن ەركىن اشا سالۋ سىرى وسىدان با دەپ ويلايمىز" دەيدى جۋرناليست الەۋمەتتىك جەلىدەگى جازباسىندا.
پۋتين ۋكرايناعا سوعىس اشقالى ۋكرايندىقتار عانا ەمەس، رەسەيلىكتەر دە ەلىنەن شارتاراپقا كەتىپ جاتىر. رەسەيلىكتەر ايالدايتىن ەلدەردىڭ قاتارىندا قازاقستان الدىڭعى ورىنداردىڭ ءبىرىن الادى.
جىل باسىنان بەرى رەسەيدىڭ 70 854 ازاماتىنا، ۋكراينانىڭ 1 467 ازاماتىنا جسن بەرىلگەن. ونىڭ ىشىندە 69 172 رەسەيلىك پەن 1 353 ۋكراينالىق ءجسن-دى كرەمل سوعىستى باستاعان 24 اقپاننان بەرى العان.
1 قاڭتاردان بەرى 519 رەسەيلىك پەن 7 ۋكراينالىق قازاقستان ازاماتتىعىنا العان.
پىكىر قالدىرۋ