بقو مامانداندىرىلعان تەرگەۋ سوتى پوليسيا دەپارتامەنتى تەرگەۋشىسىنىڭ كاسىپكەردىڭ ولىمىنە كۇدىكتىلەر – 31 جاستاعى رۋسلان قوجانتايەۆ پەن 21 جاستاعى تۇرلان امانگەلدىگە قاتىستى بۇلتارتپاۋ شاراسىن تاڭداۋ تۋرالى ءوتىنىشىن قارادى، دەپ حابارلادى موي گورود پورتالى.

سوت وتىرىسىندا "راحات لۋكۋم" كاراوكە-رەستورانىنىڭ يەسى ەركىن مۇحانعالييەۆ ولىمىنە قاتىستى جايتتار ايتىلدى. وقيعا تومەندەگىدەي ءوربيدى.

6 تامىزدا رۋسلان قوجانتايەۆ پەن تۇرلان امانگەلدى كاسىپكەرمەن كەزدەسەدى. كەزدەسۋ كەزىندە قوجانتايەۆ پىشاق الىپ، كاسىپكەردىڭ موينى مەن كەۋدە تۇسىنان 3 رەت سوققى جاسايدى. وسى ساتتە تۇرلان امانگەلدى دە پىشاعىن شىعارىپ، رەستوران قىزمەتكەرىن قورقىتىپ، ونىڭ قاشۋىنا جول بەرمەيدى. 

– مۇحانعالييەۆ ءوز ءومىرىن قۇتقارىپ قالۋ ءۇشىن اشىق تۇرعان تەرەزە ارقىلى قاشۋعا تىرىسادى. بۇل ۋاقىتتا قوجانتايەۆ وعان تاعى بىرنەشە رەت پىشاق سۇعىپ الادى. مۇحانعالييەۆ ورتالىق ستاديونعا قاراما-قارسى كولىك تۇراعىنا قاشادى. كۇدىكتىلەر ونى قۋىپ جەتىپ، امانگەلدى ونى جەرگە قۇلاتادى دا اياعىمەن تەپكىلەيدى. سودان سوڭ امانگەلدى قوجانتايەۆتىڭ پىشاعىن سۇراپ الىپ، كەمى 6 رەت پىشاق سۇعىپ الادى. اۋىر جاراقات العان مۇحانعالييەۆ وقيعا ورنىندا قازا تابادى. قوجانتايەۆ پەن امانگەلدى وقيعا ورنىنان قاشىپ كەتەدى، – دەدى پروكۋرور تاجعالييەۆ. 

ساراپتاما قورىتىندىسى بويىنشا، مۇحانعالييەۆتىڭ ولىمىنە مويىن، كەۋدە، بەل ايماعىنداعى پىشاق جاراقاتتارى، سول جاق ۇيقى ارتەرياسىنىڭ، وڭ بۇيرەكتىڭ زاقىمدانۋى جانە ماڭداي سۇيەكتەرىنىڭ سىنۋى سەبەپ بولعان.

– قوجانتايەۆ پەن امانگەلدىنىڭ تۇراقتى تابىس كوزى جوقتىعىن، ولاردىڭ اسا اۋىر قىلمىس جاساعانىن، قىلمىستىق قۋدالاۋ ورگاندارىنان جاسىرىنعانىن ەسكەرسەك، ولار جاسىرىنىپ، وبەكتيۆتى تەرگەۋگە كەدەرگى كەلتىرۋ مۇمكىن، كۋاگەرلەر مەن جابىرلەنۋشىلەرگە قىسىم كورسەتۋى ىقتيمال دەپ توپشىلاۋعا جەتكىلىكتى نەگىز بار. سوتتان پوليسيا ءبولىمى تەرگەۋشىسىنىڭ ءوتىنىشىن قاناعاتتاندىرىپ، قوجانتايەۆ پەن امانگەلدىنى 2 ايعا قاماۋعا الۋدى سانكسيالاۋدى سۇرايمىن، – دەدى پروكۋرور. 

رۋسلان قوجانتايەۆتىڭ ءوزى تەرگەۋ دالەلدەرىمەن كەلىسپەيدى. ول 2 ايەلى، بالالارى بارىن، ەكىنشى ايەلىنىڭ ايى-كۇنى جاقىن ەكەنىن ايتىپ، سوتتان ءوزىن 2 ايعا قاماۋعا الماۋدى سۇرادى.

ال، تۇرلان امانگەلدى سوتتا رۋسلان قوجانتايەۆتان قىسىم كورگەنىن، سول كۇنى قوجانتايەۆپەن بىرگە رەستورانعا بارۋعا ءماجبۇر بولعانىن ايتتى.

2 كۇدىكتى دە بۇرىن-سوڭدى سوتتالماعان. 

سۋديا رۋسلان قوجانتايەۆ پەن تۇرلان امانگەلدى 2 ايعا قاماۋعا الۋ جونىندە شەشىم شىعاردى. تەرگەۋ جۇمىستارى تولىق اياقتالعانعا دەيىن ايىپتالۋشىلار قاماۋدا بولادى.