الماتىدا 24 جاستاعى كەلىنشەك پەن ونىمەن بىرگە تۇراتىن 21 جاستاعى ەر ادام دۇنيەگە كەلگەنىنە التى كۇن بولعان قىزدارىن ساتپاق بولعان. قازىرگى ۋاقىتتا قىلمىس جاسادى دەگەن كۇدىكپەن جەتى ادام قاماۋعا الىندى. بۇل تۋرالى ىشكى ىستەر مينيسترلىگىنىڭ رەسمي ينتەرنەت رەسۋرسى حابارلادى.

الماتى قالاسى پوليسيا دەپارتامەنتىنىڭ مالىمەتىنشە، جۇپ قۇرساقتاعى بالاسىن ساتىپ الۋشىلاردى ەكى اي بۇرىن ىزدەي باستاعان.

– بالانى الماتى قالاسىنىڭ تۇرعىندارى – 48 جاستاعى ۋ.ەسىمدى ازامات پەن 46 جاستاعى ە.ەسىمدى ازاماتشا العىسى كەلگەن. تاراپتار 2 ميلليون تەڭگەگە كەلىسكەن. مامىلە وتكەن دەمالىستا جاسالدى. الايدا كريمينالدىق پوليسيا جانە ۇيىمداسقان قىلمىسپەن كۇرەس باسقارمالارى قىزمەتكەرلەرىنىڭ قالانىڭ ءار جەرىندە ءبىر ۋاقىتتا جۇرگىزگەن ارنايى ءىس-شاراسى كۇدىكتىلەردىڭ جوسپارىن بۇزدى. العاشقىلاردىڭ قاتارىندا قىزدىڭ بيولوگيالىق اتا-اناسى ۇستالدى. ودان كەيىن ىقتيمالدى ساتىپ الۋشىلار جانە ەرلى-زايىپتى دەلدالدار ۇستالدى. ارتىنشا اقشالاي سىياقى ءۇشىن بالانىڭ قۇجاتتارىن راسىمدەۋ مىندەتىن ءوز موينىنا العان 56 جاستاعى ا. ەسىمدى ازاماتشا ۇستالدى، – دەدى پوليسيا دەپارتامەنتى باستىعىنىڭ ورىنباسارى ديدار احانوۆ.

ديدار احانوۆتىڭ ايتۋىنشا، كەزدەسۋ كەزىندە دەلدالداردىڭ قولىندا ءۇش جانە ءبىر ايلىق تاعى ەكى ءسابيى بولعان.

– ەر ادام بۇلار وزدەرىنىڭ بالالارى ەكەنىن ايتا باستادى. الايدا ولار بالالاردىڭ جەكە باسىن كۋالاندىراتىن قۇجاتتى كورسەتە المادى. وسىلايشا، وسى ارنايى ءىس-شارانىڭ ناتيجەسىندە كۇدىكتىلەردەن ءۇش ءسابي الىندى. ولار مەديسينالىق مەكەمەگە تەكسەرىلۋ جانە قاجەت بولعان جاعدايدا كومەك كورسەتۋ ءۇشىن جەتكىزىلدى. كۇدىكتىلەر بۇل بالالاردى "ءتىرى" تاۋار رەتىندە پايدالانۋى مۇمكىن ەكەنىن جوققا شىعارمايمىز. تەرگەۋ مىندەتتى تۇردە شىندىقتى انىقتايتىن بولادى، – دەدى احانوۆ.