ۇلىبريتانيا سىرتقى ىستەر ءمينيسترى ليز تراسس قىركۇيەكتە بيلەۋشى كونسەرۆاتيۆتىك پارتيانىڭ جەتەكشىسى جانە پرەمەر-مينيستر بولىپ سايلانعان جاعدايدا، قىتايدى رەسەيمەن ءبىر قاتاردا ۇلىبريتانيانىڭ قاۋىپسىزدىگىنە ءقاۋىپ توندىرەدى دەپ جاريالايتىنى حابارلاندى. بۇل تۋرالى The Times گازەتىنىڭ دەرەگىنە سىلتەمە جاساعان Eurasia Daily اقپارات اگەنتتىگى ءمالىم ەتتى.

باسىلىم دەرەگىنشە، تراسس ۇلىبريتانيانىڭ سىرتقى ساياساتىن قايتا قاراۋعا، قاۋىپسىزدىك، قورعانىس جانە سىرتقى ساياسات ماسەلەلەرىنە جاڭا كەشەندى شولۋ جاساۋعا ۋادە بەرگەن.

لوندوننىڭ قاۋىپسىزدىك سالاسىنداعى ماقساتتارىن انىقتايتىن سوڭعى قۇجات 2021 جىلعى ناۋرىزدا جاريالانعان. وندا رەسەي "ۇلىبريتانيا ءۇشىن تىكەلەي ءقاۋىپ" رەتىندە سيپاتتالعان. ال جۇڭگو ساياسي جاعىنان "بريتانيالىق قۇندىلىقتار مەن مۇددەلەر ءۇشىن ۇلكەن سالدارى بار ەڭ ماڭىزدى گەوساياسي فاكتور"، ەكونوميكالىق جاعىنان "كەز كەلگەن ەلگە قاراعاندا جاھاندىق وسۋگە ىقپال ەتە الادى، بۇل – جاھاندىق ەكونوميكا ءۇشىن پايدالى بولادى" دەپ سيپاتتاعان.

بريتان ۇكىمەتىن كىم باسقاراتىنى 5 قىركۇيەكتە بەلگىلى بولادى. ساۋالنامالار سىرتقى ىستەر ءمينيسترى ليز تراسس باسەكەلەسى بۇرىنعى قارجى ءمينيسترى ريشي سۋناكتان 30 پايىزعا وزىپ كەلە جاتقانىن كورسەتكەن.