"Oyan، Qazaqstan" قوزعالىسى مەرزىمىنەن بۇرىن وتكەلى وتىرعان پرەزيدەنت سايلاۋىنا بايلانىستى مالىمدەمە جاسادى. مالىمدەمە ءماتىنىن قوزعالىس مۇشەسى، قوعام بەلسەندىسى، جۋرناليست اسەم جاپىشيەۆا جاريالادى.
قوزعالىس مۇشەلەرى توقايەۆ كەزەكتەن تىس سايلاۋ جاريالاۋ ارقىلى نازاربايەۆتىڭ بيلىكتى باسىپ الۋ ادىستەرىن قولدانىپ جاتىر دەپ سانايتىنىن، سايلاۋدى دا ونىڭ ناتيجەسىن دە مويىندامايتىنىن ايتادى.
"ءبىز، قازاقستاندىقتار — ەركىندىك پەن بەيبىتشىلىكتى سۇيەتىن، ءوز بولاشاعىمىزدى ءوزىمىز باعدارلاي الاتىن ازاماتتارمىز! ءبارىمىز ءادىل سايلاۋ مەن اشىق ساياسي جۇيەگە لايىقتىمىز دەپ سانايمىز. سوندىقتان ءبىز بۇل پرەزيدەنتتىك سايلاۋدى زاڭدى دەپ تانىمايمىز. مەرزىمىنەن بۇرىن جانە اسىعىس سايلاۋ ادىلەتتى بولا المايدى. ءبىز كەزەكتەن تىس سايلاۋدى، ونىڭ ناتيجەلەرىن مويىندامايمىز جانە بارلىق وتانداستارىمىزدى سوعان شاقىرامىز. ءبىز ناقتى وزگەرىستەردى قالايمىز جانە ول وزگەرىستەر ساياسي رەفورمالاردان، قۋعىن-سۇرگىننەن باس تارتۋدان، قۇقىقتار مەن بوستاندىقتاردى باسىپ-جانشۋدان باس تارتۋدان باستالۋ كەرەك دەپ سانايمىز" دەلىنگەن مالىمدەمەدە.
قوزعالىس مۇشەلەرى تومەندەگىدەي تالاپتارىن جەتكىزدى.
1. سايلاۋ جۇيەسىنىڭ تولىق رەفورماسى وتپەيىنشە كەزەكتەن تىس پرەزيدەنتتىك سايلاۋدان باس تارتۋدى تالاپ ەتەمىز؛
2. سايلاۋ جۇيەسىن رەفورمالاۋ جانە پرەزيدەنتتىك، پارلامەنتتىك جانە ءماسليحاتتار سايلاۋىن وتكىزۋ ەرەجەلەرىن وزگەرتۋ قاجەت. رەفورما حالىقارالىق ستاندارتتارعا جانە ەلدىڭ دەموكراتيالى قوعامدا ءادىل سايلاۋ وتكىزۋ جونىندەگى مىندەتتەمەسىنە سايكەس جۇرگىزىلۋى ءتيىس؛
3. پرەزيدەنتتىككە كانديداتتارعا قويىلاتىن تالاپتاردى جەڭىلدەتۋ قاجەت؛
4. ساياساتقا قاتىسۋعا بارلىق ازاماتتارعا مۇمكىندىك بەرىلۋى ءتيىس. قازاقستان رەسپۋبليكاسىنىڭ كونستيتۋسياسى بويىنشا بيلىكتىڭ نەگىزگى قاينار كوزى — حالىق؛
5. بارلىق ساياسي تۇتقىنداردى جانە كانتاردا قاتىسقانى ءۇشىن قۋعىنعا ۇشىراعانداردى، سونىڭ ىشىندە زاڭسىز ۇستالعان جانبولات مامايدى بوساتۋدى تالاپ ەتەمىز!
پىكىر قالدىرۋ