كۇزدە وتەتىن كەزەكتەن تىس پرەزيدەنت سايلاۋىنا شامامەن 20 ملرد تەڭگە قارجى بولىنەدى. بۇل تۋرالى ماجىلىستەگى ب ا ق وكىلدەرىنە ارنالعان الاڭدا قارجى ۆيسە-مينيسترى تاتيانا ساۆەليەۆا حابارلادى. 

ۆيسە-مينيستر و باستا سايلاۋ وتكىزۋ 2024 جىلعا جوسپارلانعاندىقتان، بويۋدجەت تە سول جىلعا جوسپارلانعانىن ايتتى. 

"ەنگىزىلگەن وزگەرىستەر مەن جاڭا تاپسىرمالاردى ەسكەرە وتىرىپ، بيىل پرەزيدەنت سايلاۋىنا ۇكىمەت رەزەرۆىنەن قاراجات بولىنەدى. ءقازىر وسك 20 ميلليارد تەڭگەگە جۋىق قاراجات كەتەتىنىن ەسەپتەپ وتىر"، - دەدى تاتيانا ساۆەليەۆا. 

قارجى ۆيسە-مينيسترى پارلامەنت سايلاۋى ءۇشىن 25 ملرد تەڭگە قاراجات جۇمسالۋى مۇمكىن ەكەنىن ايتتى. 

ونىڭ ايتۋىنشا، شىعىننىڭ 90 پايىزعا جۋىعى كوميسسيا مۇشەلەرىنىڭ جالاقىسىنا كەتەدى. 

"وتكەن سايلاۋعا 65 مىڭ ادام قاتىستى. بيىل ولاردىڭ سانى 70 مىڭنان اسادى. ولاردىڭ جالاقىسى ەڭ تومەنگى جالاقىنى ەسەپكە الا وتىرىپ ەسەپتەلىپ وتىر. ولاردىڭ جالاقىسىن ەسەپتەۋ ەڭ تومەنگى جالاقىعا نەگىزدەلەدى. 2019 جىلى سايلاۋ وتكىزگەندە 42 500 بولسا، بيىل 60 000 تەڭگە بولدى. پارلامەنت سايلاۋىنا دا شامامەن وسىنشاما شىعىن قاراستىرىلعان. ءبىراق كەلەسى جىلى ەڭ تومەنگى جالاقى 70 مىڭ تەڭگە بولاتىنىن ەسكەرسەك، بۇل شامامەن 25 ميلليارد تەڭگەنى قۇرايدى"، - دەدى ۆيسە-مينيستر.