ىشكى ىستەر ءمينيسترى مارات احمەتجانوۆ كولىك جۇرگىزۋ ءتارتىبىنىڭ تومەندىگى جول اپاتىنىڭ نەگىزگى سەبەپتەرىنىڭ ءبىرى ەكەنىن ءمالىم ەتتى، دەپ جازادى مينيسترلىكتىڭ رەسمي ينتەرنەت رەسۋرسى.

– كوپ جاعدايدا بۇعان اۆتومەكتەپتەرگە قويىلاتىن تالاپتاردىڭ جانە جۇرگىزۋشىلەردى دايارلاۋ ساپاسىنىڭ تومەندەۋى ىقپال ەتتى. ءقازىر 747 وقۋ ورتالىعى بار. 2018 جىلدان باستاپ ولارعا ليسەنزيالاۋمەن رۇقسات بەرۋ الىنىپ تاستالدى. 2020 جىلدان بەرى ولاردىڭ قىزمەتىنە مەملەكەتتىك باقىلاۋ جوق. دايىندىقتىڭ تومەن ساپاسى ءۇشىن اكىمشىلىك جاۋاپكەرشىلىك جويىلعان. وسىنىڭ كەسىرىنەن وقۋ پروسەسى فورماليزمگە اينالدى. كوپ مەكتەپتەردە كەرەكتى ماتەريالدىق بازا جوق. تالداۋ كورسەتكەندەي، ادام ولىمىنە اكەپ سوقتىرعان اپاتتاردىڭ 50%-ى "وزدەرى جۇرگىزىپ ۇيرەنگەندەردىڭ" كەسىرىنەن بولعان (917-دەن 449 جاعدايدا). مەملەكەت بۇل سالادا باقىلاۋدى جوعالتىپ العانىن مويىنداۋ كەرەك، – دەدى احمەتجانوۆ ۇكىمەتتىڭ جول قاۋىپسىزدىگى جونىندەگى وتىرىسىندا.

بيىل پوليسيا 17،5 مىڭنان استام ماس جۇرگىزۋشىنى ۇستاعان. 20 مىڭ جۇرگىزۋشى باسقارۋ قۇقىعىنان ايىرىلسا، 16 مىڭ ادام اكىمشىلىك قاماۋعا الىنعان. 188 مىڭنان استام جاياۋ جۇرگىنشىگە ايىپپۇل سالىنعان.