باس پروكۋراتۋرا قازاقستاندا ازاپتاۋلارعا بايلانىستى قىلمىستار ءۇشىن جازانى كۇشەيتۋ شارالارى تۋرالى حابارلادى.
باس پروكۋراتۋرا باسپا ءسوز قىزمەتى تاراتقان اقپاراتقا سايكەس، اتالعان ماقساتتا زاڭ قابىلدانعانىن، سونىڭ اياسىندا ازاپتاۋ ءۇشىن باس بوستاندىعىنان ايىرۋ جازاسىنىڭ ەڭ ۇزاق مەرزىمى 10 جىلدان 12 جىلعا دەيىن ۇزارتىلعان.
راقىمشىلىق، ەسكىرۋ مەرزىمى جانە تاراپتاردىڭ وكىنۋى مەن تاتۋلاسۋى نەگىزىندە قىلمىستىق جاۋاپتىلىقتان بوساتۋ ازاپتاۋ قىلمىسى ءۇشىن جويىلعان.
پروكۋراتۋرا مالىمەتىنشە، قىلمىستىق قۋدالاۋ ورگاندارى ازاپتاۋ ىستەرىن تەرگەگەندە زاڭبۇزۋشىلىقتارعا جول بەرەدى.
"تەرگەۋ ءىس-شارالارىن ۋاقتىلى جۇرگىزبەۋ دالەلدەمەلەردىڭ جوعالۋىنا جانە دالەلدەنبەگەندىكتەن ىستەردىڭ توقتاتىلۋىنا اكەپ سوعادى. جالعان كورپوراتيۆتى ىنتىماقتاستىق شىندىقتى انىقتاۋعا كەدەرگى كەلتىرەدى. ارىپتەستەر ءوز قىزمەتكەرلەرىن، دالەلدەردى جاسىرادى" دەلىنگەن حابارلامادا.
باس پروكۋراتۋرا سونداي-اق ازاپتاۋ قىلمىستارىن تەك پروكۋراتۋرا ورگاندارى تەرگەي الاتىنداي قىلمىستىق-پروسەستىك كودەكسكە تۇزەتۋلەر جوباسىن دايىندالعانىن، جوبا ءقازىر پارلامەنت قاراۋىندا ەكەنىن اتاپ ءوتتى.
پىكىر قالدىرۋ