قازاقستاندا 300 323 پاسيەنت پسيحيكالىق پروبلەما بويىنشا ديناميكالىق باقىلاۋدا. 2021 جىلى پسيحيكالىق اۋىتقۋلارى بار 9 918 پاسيەنت جانە پسيحيكالىق اۋىتقۋ ريسكى بار 13 361 پاسيەنت ەسەپكە الىنعان. بۇل تۋرالى دەنساۋلىق ساقتاۋ مينيسترلىگىنىڭ  دۇنيەجۇزىلىك پسيحيكالىق دەنساۋلىق كۇنىنە وراي جاريالاعان اقپاراتىندا ايتىلادى.

مينيسترلىك ماماندارى ستيگما مەن كەمسىتۋ پسيحيكالىق اۋىتقۋلارى بار ادامداردىڭ قوعامعا تولىق قاتىسۋىنا كەدەرگى كەلتىرەتىن كورىنبەيتىن قابىرعالار سياقتى ەكەنىن ايتادى. ءمۇنداي قابىرعالار مەكتەپتە، جۇمىس ورنىندا، مەملەكەتتىك، دەنساۋلىق ساقتاۋ مەكەمەلەرىندە جانە ءتىپتى ۇيدە دە بار.

"پسيحيكالىق اۋرۋلاردى كەمسىتۋ مەن ستيگماتيزاسيالاۋدى توقتاتۋ بارلىق مەكەمەلەردىڭ، اسىرەسە پسيحيكالىق اۋىتقۋلارى بار تۋىستارىمەن بىرگە تۇراتىن ادامداردىڭ قاتىسۋىن تالاپ ەتەدى. ستيگما مەن كەمسىتۋدى جەڭۋدىڭ ەڭ ءتيىمدى شاراسى – پسيحيكالىق دەنساۋلىق تۋرالى اقپاراتتى ارتتىرۋ جانە پسيحيكالىق دەنساۋلىق تۋرالى ءبىلىمدى ارتتىراتىن زاماناۋي باعدارلامالاردى ەنگىزۋ" دەلىنگەن مينيسترلىك حابارلاماسىندا.

بۇگىندە پسيحيكالىق دەنساۋلىق سالاسىندا مامانداندىرىلعان كومەكتى 2 رەسپۋبليكالىق، 17 وڭىرلىك پسيحيكالىق دەنساۋلىق ورتالىعى (وبلىس ورتالىقتارىندا جانە رەسپۋبليكالىق ماڭىزى بار قالالاردا بىر-بىردەن)، 83 باستاپقى پسيحيكالىق دەنساۋلىق ورتالىعى (قالالىق ەمحانالار جانىندا)، 192 كابينەت (اۋداندىق ەمحانالار جانىندا) كورسەتەدى"