بۇگىن الماتى قالاسى رەسپۋبليكا سارايىندا «مەيىرىمدى مۇحاممەد» رۋحاني ءماۋلىت كەشى ءوتتى.  رۋحاني كەشتىڭ ۇيىمداستىرۋشىسى – قمدب الماتى قالالىق ورتالىق مەشىتى.

كەشكە قمدب ءتوراعاسى، باس ءمۇفتي ناۋرىزباي قاجى تاعان ۇلى قاتىسىپ، جينالعان حالىقتى قۇتتىقتاپ ارنايى بايانداما جاسادى.

الماتى قالاسى اكىمىنىڭ قۇتتىقتاۋ حاتىن قالالىق ءدىن ىستەرى باسقارماسىنىڭ باسشىسى نۇرلان قيقىموۆ وقىپ بەردى. ءماۋلىت كەشىنە دەمەۋشىلىك جاساعان كاسىپكەر باحرەددين نۇعمان ۇلى جانە زيالى قاۋىم وكىلدەرى، اقساقالدار، مەشىت جاماعاتى مەن يمامدار قاتىستى.

اقىن، سازگەر جاكەن وماروۆ جىلداعى داستۇرمەن پايعامبارىمىزدىڭ ءومىربايانىن قازاق تىلىندە جىرلاپ، بيىل حيجرەتتىڭ 4-5 جىلدار وقيعاسىن باياندادى. بۇعان دەيىنگى ءماۋلىت مەرەكەلەرىندە پايعامبارىمىزدىڭ بالالىق شاعى، ودان كەيىن پايعامبارلىقتىڭ كەلۋى، ميعراجعا كوتەرىلۋى، ودان كەيىن حيجرەتتىڭ العاشقى جىلدارى مەن ءبادىر سوعىسى، ۋحۋد سوعىسى، حازرەتى حامزانىڭ شەيىت بولۋىنا توقتالعان بولاتىن.

ماۋلىتكە ارنالعان مەرەكەلىك شارادا «ونەر قىراندارى» تەاترى ۇجىمى ساحنالىق قويىلىمدار قويدى. بۇل كورىنىستەردە اللاعا تاۋەكەل ەتۋ، تەرىس قىلىقتاردان اۋلاق بولۋ، دۇرىس دوس تاڭداي ءبىلۋ، بالا تاربيەسىندەگى اتا-انانىڭ ءرولى ت.ب. ءماندى دۇنيەلەر باياندالدى.

«حاس-ساق» ەتنو-فولكلورلىق ءانسابلى، قاناتبەك پولاتبەك جانە رينات تورە سىندى ەسترادا انشىلەرى ءيلاھي اندەر ورىنداپ، پايعامبارعا دەگەن ساعىنىشتارىن انمەن جەتكىزدى. سونىمەن قاتار پايعامبار سۇننەتىن ومىرىنە تەمىرقازىق ەتىپ ءوسىپ كەلە جاتقان جاس جەتكىنشەكتەر پايعامبارىمىز جايلى پوەزيا وقىدى. پايعامبار ومىرىنەن مول ماعلۇمات بەرەتىن كورمە ۇيىمداستىرىلىپ، كورەرمەن نازارىنا ۇسىنىلدى.

بيىلعى رۋحاني ءماۋلىت كەشىنىڭ ەرەكشەلىگى كورەرمەن سۇراۋى بويىنشا ءبىر كۇندە ەكى رەت قويىلىم كورسەتىلدى. تاڭعى جانە تۇسكى قويىلىم بارىسىندا رەسپۋبليكا سارايى كورەرمەنگە لىق تولدى.

كەش سوڭىندا باس ءمۇفتي رۋحاني ءىس-شارانىڭ وتۋىنە دەمەۋشىلىك جاساعان بەلگىلى مەسەنات باحاريدين نۇعمانۇلىن «قازاقستان مۇسىلماندارى ءدىني باسقارماسىنا 30 جىل» مەرەكەلىك مەدالمەن ماراپاتتادى.

سونداي-اق مەرەكەلىك باعدارلاماعا ۇلەس قوسقان بەلگىلى جىرشى جاكەن وماروۆقا، «ونەر قىراندارى» مەن «HasSak» ۇجىمىنا العىس حاتىن تابىستاپ، ريزاشىلىق نيەتىن جەتكىزدى. سونىمەن قاتار بيلەتتەن تۇسكەن قاراجاتتان «ءماۋلىت سىيى» رەتىندە «نۇر-مۇباراك» ەگيپەت يسلام ۋنيۆەرسيتەتىنىڭ جاڭا عيماراتىنىڭ قۇرىلىسىنا 4 000 000 تەڭگەنىڭ سەرتيفيكاتى بەرىلدى. جانە دە كومەككە مۇقتاج ازاماتتارعا قارجىلاي سەرتيفيكاتتار تابىستالدى. «ەل ۇلەسى - پاتەرگە» جوباسى بويىنشا رەسپۋبليكا بويىنشا 596-باسپانا، الماتى قالاسى بويىنشا 20-باسپانا كىلتىن تۇركسىب اۋداندىق «مەككە» مەشىتىنىڭ يمامى، 7 بالانىڭ اكەسى راحماتۋللا موللاقاعاناتۇلىنا تابىستادى. بۇدان بولەك الماتى ورتالىق مەشىتىنىڭ جانىنان اشىلعان ونلاين قۇران كۋرسىنىڭ بەلسەندى ۇستازىنا توسىن سىي رەتىندە ۇمرا قاجىلىعىنىڭ سەرتيفيكاتى بەرىلدى. كورەرمەندەرگە ءماۋلىت كەشىنە ارنايى جازىلعان «پايعامبارىمىزدىتا نيسىز با؟» كىتابى مەن ءمۇفتياتتىڭ ءتول باسىلىمى «Munara» گازەتى جانە «يمان» جۋرنالى تەگىن تاراتىلدى.

شارانىڭ باستى ماقساتى – پايعامبارىمىزعا سالاۋات ايتۋ، ونىڭ اسىل قاسيەتتەرىن دارىپتەۋ، حالىق اراسىندا يماندىلىقتى ناسيحاتتاي وتىرىپ، تۇراقتىلىق پەن تىنىشتىققا ۇندەۋ بولىپ تابىلدى.

الماتى ورتالىق مەشىتىنىڭ باسپا ءسوز قىزمەتى