جاقيانوۆ جاۋاپ بەرەدى: نازاربايەۆ وپپوزيسياعا وكپەلەپ، ءوشىن سەمەيدەن الدى ما؟

/image/2022/10/18/crop-48_16_683x1215_photo_5364103644204613604_y.jpg

مەملەكەت جانە قوعام قايراتكەرى، سەمەي، پاۆلودار وبلىستارىنىڭ بۇرىنعى اكىمى، "قازاقستاننىڭ دەموكراتيالىق تاڭداۋى" قوعامدىق قوزعالىسىن قۇرۋشىلاردىڭ ءبىرى عالىمجان جاقيانوۆ ەكس-پرەزيدەنت نۇرسۇلتان نازاربايەۆ بيلىك ەتكەن تۇستا سەمەي قالاسىنا سيرەك بارعانى وسى وڭىردەن وپپوزيسيا وكىلدەرى كوپتەپ شىققانىمەن بايلانىستى بولۋى مۇمكىن دەگەن اڭگىمەنىڭ جانى بار دەگەن پىكىردە. بۇل تۋرالى ول Dopesoz youtube جوباسىنا بەرگەن سۇحباتىندا جەتكىزدى.

سۇحبات بارىسىندا جۇرگىزۋشىلەردىڭ ءبىرى بىرنەشە جىل قاتارىنان سەمەيگە بارىپ، قالانىڭ كۇيىن كورىپ كوڭىلى قالعانىن، سەمەيلىكتەر اراسىندا نۇرسۇلتان نازاربايەۆ قالاعا سيرەك كەلگەنىن سەمەي وڭىرىنەن وپپوزيسيا وكىلدەرى كوپتەپ شىعۋىمەن بايلانىستىراتىن اڭگىمە بارى تۋرالى ەستىگەنىن ايتادى.

 

– ول راس. سەمەي وبلىسى مەن كەتكەننەن سوڭ بىر-ەكى ايدان كەيىن جابىلدى. مەن 97 جىلى كەتكەم، جاڭا اكىمدى قويعاندا نازاربايەۆ كەلگەن، ودان كەيىن بارعانىن ەستىمەدىم. مۇمكىن ءبىر رەت بولعان شىعار. سودان بەرى ساياسي قۇبىلىس دەيمىز بە، سوندايدى بايقاۋعا بولادى. سەمەي جەرىنەن وزىنە قارسىلاس اتانعاندار كوپتەپ شىققاننان كەيىن بارماي قويعان شىعار" دەگەن ول "سەمەي وبلىسى جابىلعاننان كەيىن قالا، حالىق جاعدايى ناشارلاپ، وسى ءۇشىن جەرگىلىكتى حالىق نازاربايەۆقا نارازى" دەيدى ساياساتكەر. 

سونداي-اق عالىمجان جاقيانوۆ سەمەي وبلىسىن جابۋعا قارسى بولعانىن، نۇرسۇلتان نازاربايەۆتان وبلىستى جابۋ تۋرالى شەشىم قابىلداماستان بۇرىن ويلانۋدى سۇراعانىن اتاپ ءوتتى.

اقپارات كوزدەرىندە نۇرسۇلتان نازاربايەۆ سوڭعى رەت سەمەيگە 2015 جىلى شقو-عا جاساعان ساپارى اياسىندا بارعانى تۋرالى اقپارات بار.

1939 جىلى قۇرىلعان سەمەي وبلىسى 1997 جىلى جابىلعان. ءوڭىر قازاق حالقىنىڭ باي تاريحىمەن تىعىز بايلانىستى. سەمەيدە ۇلى اقىن-جازۋشىلار دۇنيەگە كەلگەن. سەمەي الاشوردا ۇكىمەتىنىڭ استاناسى بولعان. 1991 جىلدان كەيىن بيلىكتە بولىپ، ارتىنشا نازاربايەۆتى، ونىڭ قۇرعان جۇيەسىن وتكىر سىناعان ءبىرسىپارا ازامات تا وسى وڭىردەن شىققان. ولاردىڭ قاتارىندا 1990-1995 جىلدارى قازاق كسر جوعارى كەڭەسىنىڭ ءتوراعاسى، 1999 جىلعى پرەزيدەنت سايلاۋىندا نازاربايەۆتىڭ باسەكەلەسى، ءماجىلىس دەپۋتاتى بولعان سەرىكبولسىن ءابدىلدين، قازاقستاننىڭ 2ء-شى پرەمەر-مينيسترى اكەجان قاجىگەلدين بار. عالىمجان جاقيانوۆ تا شىعىس تۋماسى. الايدا ول دۇنيەگە كەلگەن كۇرشىم اۋدانى سەمەي وبلىسىنا كىرمەگەن.

پىكىر قالدىرۋ

قاتىستى ماقالالار