اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە الماتى قالاسى اكىمدىگى، قوعامدىق دامۋ باسقارماسى «قوعامدىق كەلىسىم» مەكەمەسى جانە ۋنيۆەرسيتەتتىك «رۋحاني جاڭعىرۋ» جوبالىق كەڭسەسىنىڭ ۇيىمداستىرۋىمەن «ەتنوسارالىق كەلىسىمنىڭ قازاقستاندىق مودەلى» تاقىرىبىندا سەمينار ءوتتى. 

سەميناردىڭ نەگىزگى مىندەتى – قوعامدىق كەلىسىم مەن جالپىۇلتتىق بىرلىكتى، ەتنوسارالىق قارىم-قاتىناس جاساي وتىرىپ، رۋحاني قۇندىلىعىمىز بولعان، مەملەكەتتىك ءتىلدى نىعايتۋ سالاسىندا جاستار اراسىندا اقپاراتتىق ءتۇسىندىرۋ جۇمىستارىن جۇزەگە اسىرۋ بولىپ تابىلادى. 

سەمينارعا اباي اتىنداعى قازۇپۋ-نىڭ الەۋمەتتىك دامۋ جونىندەگى پرورەكتورى شىڭعىس نۇرلان ۇلى، «يرنىحاس» وسەتين مادەني-اعارتۋ ورتالىعىنىڭ ءتوراعاسى، قازاقستان حالىقتارى اسسامبلەياسىنىڭ مۇشەسى، ەتنوسارالىق قاتىناستار ماسەلەلەرى جونىندەگى ءاقپاراتتىق-تۇسىندىرۋ توبىنىڭ مۇشەسى، قوعام قايراتكەرى قازبەك مامسۋروۆ، الەمدىك ەكونوميكا جانە حالىقارالىق قاتىناستار ينستيتۋتىنىڭ ديرەكتورى، ەكونوميكا عىلىمدارىنىڭ دوكتورى، الماتى قالاسىنىڭ قوعامدىق كەلىسىمىنىڭ مۇشەسى، رەسپۋبليكالىق ۇيعىرلار بىرلەستىگىنىڭ جەتەكشىسى اكيمجان ارۋپوۆ، ت.ك.جۇرگەنوۆ اتىنداعى ءقازۇوا «قازاقستان تاريح پەن الەۋمەتتىك عىلىمدار» كافەدراسىنىڭ وقىتۋشىسى، زاڭ ماگيسترى قاناتبەك ەرعازى ۇلى، فيلولوگيا عىلىمدارىنىڭ كانديداتى، دوسەنت، قازاقستان حالقى اسسامبلەيا كافەدراسىنىڭ مەڭگەرۋشىسى گۇلجيھان پىشەنباي قىزى، ۋنيۆەرسيتەتتىك «بىرلىك» ستۋدەنتتىك اسسامبلەياسىنىڭ ستۋدەنتتەرى، ينستيتۋتتاردىڭ ديرەكتورات وكىلدەرى جانە پروفەسسور وقىتۋشىلار قۇرامى مەن ستۋدەنتتەر قاتىستى. 

سپيكەرلەر مەن قوناقتار ستۋدەنتتەرگە ەلىمىزدەگى ەتنوسارالىق مادەنيەتتى قالىپتاستىرۋ نەگىزدەرى مەن ونىڭ مودەلى، كوپۇلتتى مەملەكەت بولۋىمىزدىڭ ماڭىزدىلىعى تۋرالى ءوز ويلارىن ورتاعا سالدى. 

«اباي اتىنداعى قازاق ۇلتتىق پەداگوگيكالىق ۋنيۆەرسيتەتى كوپتەگەن جۇمىستار اتقارۋدا. وقۋ ورنىمىزدا قازاقستان حالقى اسسامبلەياسى كافەدراسى مەن «بىرلىك» ستۋدەنتتەر اسسامبلەياسى جۇمىس ىستەيدى. ولار ءوز جۇمىس جوسپارى بويىنشا قوعامنىڭ ودان ارى بىرىگۋى، ەتنوكونفەسسيونالدىق قاتىناستاردى ۇيلەستىرۋ، ەتنوسارالىق كەلىسىمدى نىعايتۋ، ەتنوساياسي باعىتتاعى وقۋ-تاربيە جانە عىلىمي-زەرتتەۋ جۇمىستارىن ۇيلەستىرۋ، قوعامدىق كەلىسىمنىڭ قازاقستاندىق مودەلىن ناسيحاتتاۋدىڭ ءبىرىڭعاي ءادىسنامالىق جانە پراكتيكالىق جولدارىن ۇسىنۋ باعىتىندا كۇش جۇمىلدىرادى»، - دەدى پرورەكتور شىڭعىس نۇرلان ۇلى.