ۇكىمەت وتىرىسىندا ءبىلىم بەرۋدى دامىتۋدىڭ 2022-2026 جىلدارعا ارنالعان تۇجىرىمداماسى بەكىتىلدى.
وقۋ-اعارتۋ ءمينيسترى اسحات ايماعامبەتوۆتىڭ ايتۋىنشا، جەكەلەگەن پاندەر بويىنشا مەكتەپ باعدارلامالارى جەتىلدىرىلەدى. وقۋ پروسەسىن سيفرلاندىرۋ شەڭبەرىندە ءبىرقاتار جوبالار ىسكە اسىرىلىپ، شاعىن كومپلەكتىلى مەكتەپتەردە جەكەلەگەن پاندەردى ونلاين وقىتۋ جانە دەربەس سيفرلىق وقۋلىقتار (ءموبيلدى قوسىمشا) ازىرلەۋ جوسپارلانعان.
سيفرلاندىرۋ اياسىندا اتتەستات پەن ديپلومداردى QR-كودپەن ماركەرلەپ سيفرلىق فورماتتا بەرۋ كوزدەلىپ وتىر. ءار وقۋشىنىڭ سيفرلىق ءپروفيلى بولادى. بالاباقشا ءۇشىن كەزەكتىڭ ءبىرىڭعاي، ورتالىقتاندىرىلعان كەزەگى ەنگىزىلەدى.
جيىندا 2025 جىلعا قاراي جاڭا قۇرىلىس ستاندارتتارى بويىنشا جالپى سانى 840 مىڭ ورىنعا ارنالعان مەكتەپتەر سالۋ جوسپارلانىپ وتىرعانى ايتىلدى.
پرەمەر-مينيستر ءاليحان سمايلوۆتىڭ ايتۋىنشا، جاستاردى كاسىپكەرلىك داعدىلارىنا وقىتۋ ءۇشىن كوللەدجدەر، ونىڭ ىشىندە اۋىلدىق كوللەدجدەر جانىنان شاعىن يننوۆاسيالىق كاسىپورىندار قۇرىلاتىن بولادى.
– بۇل – كوللەدج تۇلەكتەرىنىڭ 75%-ىن وقۋ بىتىرگەننەن كەيىن بىردەن جۇمىسقا ورنالاستىرۋعا مۇمكىندىك بەرەدى. سونداي-اق جەتەكشى جوعارى وقۋ ورىندارىن زەرتتەۋ ۋنيۆەرسيتەتتەرىنە ترانسفورماسيالاۋ جۇرۋدە، سونداي-اق بەدەلدى شەتەلدىك ۋنيۆەرسيتەتتەر فيليالدارىنىڭ سانى دا ارتادى. 2026 جىلعا قاراي باكالاۆرلار ستيپەندياسىنىڭ مولشەرى 2 ەسەگە، ماگيسترانتتار مەن دوكتورانتتاردىڭ ستيپەندياسى 1،5 ەسەگە ارتادى، – دەدى ول.
پىكىر قالدىرۋ