رەسەي دۋماسىنداعى بيلىك پارتياسى "ەدينايا روسسيا"-دان سايلانعان دەپۋتاتتار قىلمىستىق كودەكسكە موبيليزاسيادان قاشقانداردى قىلمىستىق جازاعا تارتۋ تۋرالى تۇزەتۋ ەنگىزۋ بويىنشا زاڭ جوباسىن ۇسىندى، دەپ جازادى كوممەرسانت باسىلىمى.
دەپۋتتاتتار موبيليزاسيادان قاشقاندارعا 200 مىڭ مەن 500 مىڭ رۋبل اراسىندا نەمەسە 1-3 جىلداعى تابىسى كولەمىندە ايىپپۇل سالۋ، كۇشتەپ ەڭبەككە تارتۋ نەمەسە بەس جىلعا دەيىن باس بوستاندىعىنان ايىرۋدى ۇسىنىپ وتىر.
مەملەكەتتىك دۋماداعى قاۋىپسىزدىك جانە جەمقورلىقپەن كۇرەس جونىندەگى كوميتەت ءتوراعاسىنىڭ ورىنباسارى ەرنەست ۆالەيەۆ زاڭ جوباسى پارلامەنت قاراۋىنا ۇسىنۋعا ءازىر ەكەنىن جەتكىزدى.
رەسەيدە 21 قىركۇيەكتە ءىشىنارا موبيليزاسيا جاريالانعان. ەلدىڭ قورعانىس مينيسترلىگى ۋكرايناداعى سوعىسقا جۇمىلدىرىلۋ ءۇشىن 300 مىڭ ادام اسكەرگە شاقىرىلعانىن حابارلادى.
28 قازاندا قورعانىس ءمينيسترى سەرگەي شويگۋ پرەزيدەنت ۆلاديمير پۋتينگە ءىشىنارا موبيليزاسيا اياقتالعانىن حابارلاعان. 30 قازاندا پۋتين موبيليزاسيانى توقتاتۋ تۋرالى جارلىققا قول قويۋى مۇمكىن ەكەنىن ايتتى. الايدا ازىرگە ناقتى قۇجات جوق. ال 31 قازاندا مينيسترلىك زاپاستاعى اسكەريلەردى شاقىرۋ توقتاتىلعانىن جاريالادى.
پىكىر قالدىرۋ