23-24 قازاندا الماتى قالاسىنداعى «الاش» ستاديونىندا قازاقستان ۇيعىرلارىنىڭ رەسپۋبليكالىق ەتنومادەني ورتالىعى ۇيىمداستىرۋىمەن رەسپۋبليكا كۇنىنە ارنالعان «DOSTYQ» كۋبوگىنا اۋەسقويلار اراسىندا فۋتبول ءتۋرنيرى ءوتتى، دەپ حابارلادى قازاقستان حالقى اسسامبلەياسىنىڭ باسپا ءسوز قىزمەتى.

قازاقستان حالقى اسسامبلەياسىنىڭ قولداۋىمەن وتكەن تۋرنيرگە الماتى قالاسىنان، سونداي-اق الماتى جانە جەتىسۋ وبلىستارىنان فۋتبول كوماندالارى قاتىستى. جەڭىمپازداردى قازاقستان ۇيعىرلارى رەسپۋبليكالىق ەتنومادەني ورتالىعى جوعارى كەڭەسىنىڭ ءتوراعاسى، قحا كەڭەسىنىڭ مۇشەسى، رەكسۋك جانىنداعى «جيگيت بەشي» كەڭەسىنىڭ ءتوراعاسى دولكۋنتاي ابدۋلحاليل، «ۇيعىر اۆازي» قوعامدىق-ساياسي گازەتىنىڭ باس رەداكتورى، رەكسۋك ءتوراعاسىنىڭ ورىنباسارى، قحا مۇشەسى ەرشات اسمەتوۆ ماراپاتتاپ، قاتىسۋشىلاردى رەسپۋبليكا كۇنىمەن قۇتتىقتادى.

تۋرنير قورىتىندىسى بويىنشا 1 ورىندى ءجۇزدىباستاۋ كەنتىنەن «گرەميو» كومانداسى، 2 ورىندى گۇلدالا كەنتىنەن «گۇلدالا» كومانداسى، 3 ورىندى پانفيلوۆ اۋدانىنان «جاركەنت» كومانداسى يەلەندى.

جەكە كاتەگوريالار بويىنشا ۇمىتكەرلەر دە انىقتالدى. ماسەلەن، «گرەميو» فك ويىنشىسى دجۋبانگالييەۆ الىبەك ۇزدىك قاقپاشى اتاندى. ۇزدىك قورعاۋشى – ەۆسەيەۆ ميحايل («جاركەنت» فك)، ۇزدىك شابۋىلشى -قاپجاپاروۆ دياس («گۇلدالا» فك)، ۇزدىك بومباردير – حوشنازاروۆ يالكۋنجان («گرەميو» فك) بولدى.

ءتۋرنيردىڭ وتۋىنە «Metall Prom Group» ج ش س قولداۋ كورسەتتى.