20 قازان كۇنى الماتى قالاسى رەسپۋبليكالىق دوستىق ۇيىندە ۇلتتىق مەرەكە – رەسپۋبليكا كۇنىنە ارنالعان «كوك بايراقتى قۇت مەكەنىم» اتتى مەرەكەلىك ءىس-شارا ءوتتى.

ءىس-شاراعا قازاقستان رەسپۋبليكاسىنىڭ ەڭبەك سىڭىرگەن قايراتكەرى، اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ورىنداۋشىسى تالعات كۇزەمبايەۆ، قازاقستان حالقى اسسامبلەياسىنىڭ مۇشەلەرى، ەتنومادەني بىرلەستىكتەردىڭ شىعارماشىلىق ۇجىمدارى مەن جاستار قاتىستى.

كەش بارىسىندا قوناقتار الداعى رەسپۋبليكا كۇنى مەرەكەسىمەن قۇتتىقتاپ، وزدەرىنىڭ ىزگى تىلەكتەرىن ءبىلدىردى. سونىمەن قاتار كونسەرتتىك باعدارلاما ۇيىمداستىرىلىپ، قازاقستان رەسپۋبليكاسىنىڭ مەملەكەتتىك سىيلىعىنىڭ يەگەرى، ەڭبەك سىڭىرگەن قايراتكەرى تالعات كۇزەمبايەۆ، حالىقارالىق كونكۋرستاردىڭ لاۋرەاتى رادا فلامەنكو، ت. جۇرگەنوۆ اتىنداعى ونەر اكادەمياسىنىڭ دارىندى تۇلەكتەرى، ەتنومادەني بىرلەستىكتەردىڭ شىعارماشىلىق ۇجىمدارى ءوز ونەرلەرىن كورسەتتى.

ايتا كەتسەك، 1990 جىلعى 25 قازاندا قازاق كسر جوعارعى كەڭەسىنىڭ №307-XII قاۋلىسىمەن قازاق كسر مەملەكەتتىك ەگەمەندىگى تۋرالى دەكلاراسيا قابىلداندى. دەكلاراسيا قازاق كسر ەگەمەندىگىن جاريالاپ، قازاقستاننىڭ تاۋەلسىز مەملەكەت رەتىندەگى ساياسي-قۇقىقتىق نەگىزدەرىن ايقىندادى. بۇل مەرەكەنىڭ تاريحي ماڭىزعا يە ەكەندىگىن ەسكەرە وتىرىپ اعىمداعى جىلدىڭ

29 قىركۇيەگىندە مەملەكەت باسشىسى ق. توقايەۆ «قازاقستان رەسپۋبليكاسىنىڭ كينەماتوگرافيا، مادەنيەت جانە مەرەكە ماسەلەلەرى بويىنشا كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى، وسىعان سايكەس رەسپۋبليكا كۇنىنە ۇلتتىق مەرەكە مارتەبەسى قايتارىلدى.