كەشە پرەزيدەنت قول قويعان "راقىمشىلىق جاساۋ تۋرالى" زاڭعا ساي سوتتالعانداردان مەرزىمىنەن بۇرىن بوساۋى ءۇشىن كىناسىن مويىنداۋ تالاپ ەتىلمەيدى. بۇل تۋرالى ادام قۇقىعى جونىندەگى ومبۋدسمەن ەلۆيرا ءازىموۆا ءمالىم ەتتى.
ال باس پروكۋروردىڭ ورىنباسارى اسەت شىندالييەۆ زاڭ كۇشىنەن ەنگەنىن، اۋىرلىعى جەڭىل جانە ورتاشا قىلمىستار ءۇشىن سوتتالعاندار بوساتىلاتىنىن جەتكىزدى.
اسەت شىندالييەۆتىڭ سوزىنشە، تەرگەلىپ جاتقان ازاماتتار بوساتۋعا ءوتىنىش بەرە الادى.
ءىستى بولعاندار قاشان بوستاندىققا شىعاتىنى ازىرگە بەلگىسىز.
بۇعان دەيىن راقىمشىلىقتىڭ باستى شارتتارىنىڭ ءبىرى ايىپكەر كىناسىن مويىنداپ، ىستەگەن ىسىنە وكىنۋگە ءتيىس ەكەنى ايتىلعان.
امنيستيا لاڭكەستىك جاسادى دەپ ايىپتالعاندارعا، ەكسترەميست دەپ تانىلعاندارعا، جەمقورلىق قىلمىستارىن، وتانعا وپاسىزدىق جاساعاندارعا، جاپپاي تارتىپسىزدىك ۇيىمداستىرعاندارعا، ازاپتاۋشىلارعا، كامىلەت جاسىنا تولماعانداردىڭ جىنىستىق قولسۇعىلماۋشىلىعىنا قارسى قىلمىس جاساعاندارعا قولدانىلمايدى.
پىكىر قالدىرۋ