سەمەيدە 1200 ورىندىق مەكتەپ سالىنادى. اباي وبلىسىنىڭ اكىمى نۇرلان ۇرانحايەۆ پەن «KAZ Minerals Management» ج ش س باسقارما ءتوراعاسى ەلدار مامەدوۆ الەۋمەتتىك جوبانى ىسكە اسىرۋ ماسەلەلەرى بويىنشا ءوزارا ءىس-قيمىل تۋرالى مەموراندۋمعا قول قويدى.
مەموراندۋمعا سايكەس، اباي وبلىسىنىڭ اكىمدىگى مەكتەپ سالۋ ءۇشىن جەر تەلىمىن بەرەدى. قۇرىلىس اياقتالعاننان كەيىن KAZ Minerals كومپانياسى ءبىلىم بەرۋ وبەكتىسىن اكىمدىكتىڭ كوممۋنالدىق مەنشىگىنە وتكىزەدى. قۇرىلىس قۇنى جوبالىق-سمەتالىق قۇجاتتامانى دايىنداعاننان كەيىن انىقتالاتىن بولادى.
«ءبىزدىڭ وبلىستا مەكتەپ سالۋ ماسەلەسى وتە وزەكتى. مەملەكەت باسشىسى قاسىم-جومارت توقايەۆ سەمەي قالاسىنا ساپارى بارىسىندا ءوڭىر مەكتەپتەرىندە ورىن تاپشىلىعى ماسەلەسىن شەشۋدى تاپسىردى. بۇگىنگى تاڭدا وبلىس بويىنشا ورىن تاپشىلىعى شامامەن 9 مىڭدى قۇرايدى. «جايلى مەكتەپ» ۇلتتىق جوباسى اياسىندا 2025 جىلعا دەيىن 11 مەكتەپ سالۋ جوسپارلانۋدا. جاڭا وبلىسىمىز ءۇشىن وسىنداي ماڭىزدى جوبالاردى قولداۋعا دايىن الەۋمەتتىك باعدارلانعان كومپانيالاردىڭ بولۋى ماڭىزدى»، - دەپ اتاپ ءوتتى وبلىس اكىمى نۇرلان ۇرانحايەۆ.
«Kaz Minerals توبى ءۇشىن ءبىلىم بەرۋ ماسەلەسى الەۋمەتتىك ينۆەستيسيالار جانە تۇراقتى دامۋ سالاسىنداعى باسىمدىقتاردىڭ ءبىرى بولىپ قالا بەرەدى. قازىرگى ۋاقىتتا ءبىزدىڭ جوعارى جانە ورتا ارناۋلى وقۋ ورىندارىمەن ىنتىماقتاستىعىمىز بار. مەكتەپ تۇلەكتەرىنە گرانتتار بولەمىز، جاس مامانداردى زاماناۋي كاسىپورىندارىمىزعا ودان ءارى جۇمىسقا ورنالاستىرۋ مۇمكىندىگىمەن تاعىلىمداما باعدارلاماسىن ىسكە اسىرامىز. ءبىز ءۇشىن ايماق جاستارىنىڭ دامۋى ماڭىزدى. مەكتەپ قۇرىلىسى ءبىزدىڭ ۇزدىكسىز ءبىلىم بەرۋ تاسىلىمىزگە سايكەس كەلەدى. وبلىس مارتەبەسىن الۋ ءوڭىر ءۇشىن ءار سالادا، ونىڭ ىشىندە ءبىلىم سالاسىندا دا جاڭا پەرسپەكتيۆالاردى اشادى»، - دەپ اتاپ ءوتتى «KAZ Minerals Management» باسقارما ءتوراعاسى ەلدار مامەدوۆ.
انىقتاما ءۇشىن: 2015-2021 جىلدار ارالىعىندا قازىرگى اباي وبلىسىنىڭ اۋداندارىنداعى الەۋمەتتىك سالانى قولداۋ شەڭبەرىندە Kaz Minerals توبى سەمەي قالاسىنىڭ جمجا ءۇي-جايلارىن، جەزكەنت كەنتىنىڭ اۋرۋحاناسى مەن مادەنيەت ءۇيىن، اياگوز اۋدانىنىڭ اۋداندىق اۋرۋحاناسى ءۇشىن ءۇي-جايلاردى جوندەۋدى جانە مەديسينالىق جابدىقتاردى جەتكىزۋدى، سەمەي قالاسىنداعى بالالارعا ارنالعان وڭالتۋ ورتالىعىنا ارنالعان ءۇي-جايلاردى رەكونسترۋكسيالاۋدى، اياگوز قالاسىنداعى سۋ تاسقىنىنان كەيىنگى قالپىنا كەلتىرۋ جۇمىستارىن قارجىلاندىرعان. سونىمەن قاتار، كومپانيا كومەگىمەن اياگوز قالاسىنىڭ پوليتەحنيكالىق كوللەدجنە ارنالعان 104 ورىندىق جاتاقحانا، سپورتتىق ينتەرناتتىڭ 200 ورىندىق جاتىن كورپۋسىنىڭ عيماراتى جانە سەمەي قالاسىنداعى №1 بجسم عيماراتىنا قوسىمشا كۇرەس زالىن جانە ت.ب. سالىندى.
پىكىر قالدىرۋ