بۇگىن الماتى قالاسىندا ءال-فارابي اتىنداعى قازاق ۇلتتىق ۋنيۆەرسيتەتىندە قازاقستان مۇسىلماندارى ءدىني باسقارماسىنىڭ ۇيىمداستىرۋىمەن «بەرەكە باستاۋى – بىرلىكتە» تاقىرىبىندا رەسپۋبليكالىق عىلىمي-تانىمدىق كونفەرەنسيا ءوتتى. باس ءمۇفتي ناۋرىزباي قاجى تاعان ۇلى ارنايى بايانداما جاسادى.

ايتۋلى جيىن قاسيەتتى قۇران اياتىمەن اشىلىپ، باس ءمۇفتي ناۋرىزباي قاجى تاعان ۇلى بابالار رۋحىنا ايات ساۋابىن باعىشتادى. وسىدان كەيىن قوعامدا بىرلىكتى نىعايتۋدىڭ ماڭىزى مەن وسى باعىت بويىنشا ءمۇفتياتتىڭ اتقارعان جۇمىستارى جايلى ازىرلەنگەن بەينە روليك حالىق نازارىنا ۇسىنىلدى.

كونفەرەنسيا جۇمىسىنا قمدب ءتوراعاسى ناۋرىزباي قاجى تاعان ۇلى، ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى جانسەيىت تۇيمەبايەۆ، جازۋشى سماعۇل ەلۋباي ت.ب. زيالى قاۋىم وكىلدەرى، عالىمدار، الماتى قالاسىنىڭ باس يمامى تولەبي ءدادىل ۇلى باستاعان ءدىن قىزمەتكەرلەرى، شاكىرتتەر مەن ستۋدەنتتەر قاتىستى.

«قۇراندا: «(اللا پايعامبارلارىن جىبەرۋارقىلى) جەر بەتىن تۇزەپ، جونگە كەلتىرگەننەن كەيىن، وندا بۇلىك شىعارىپ، بۇزىقتىق جاساماڭدار. ودان قورقىپ ءارى مەيىرىمىنەن ءۇمىت ەتە وتىرىپ دۇعا ەتىڭدەر. ءشۇباسىز، اللانىڭ راقىمى ىزگى جاندارعا وتە جاقىن» («اعراف» سۇرەسى، 56-ايات) دەيدى.

راسىندا حالىقتار اراسىنداعى تاتۋلىق ادامدار اراسىنداعى تاتۋلىقتان، باۋىرلاستىقتان باستالادى. باۋىرلاستىق جالپى ادامزاتتىق تۋىسقاندىققا جول اشادى. اعاشتىڭ ءدىڭى مىقتى بولماسا، بۇتاعى دا ءالسىز بولماي ما؟ ولاي بولسا الدىمەن كوزى اشىق ازاماتتار ءوزارا تاتۋ بولۋى كەرەك. سوندا عانا ادامزات تاتۋلىقتىڭ تۋىن بيىك ۇستايدى. سەبەبى پاراساتتى ادامدار اۋرۋدىڭ ەمىن وزگەلەردەن ارتىق بىلەدى» دەدى ناۋرىزباي قاجى تاعان ۇلى.

كونفەرەنسيادا «يسلام – ىنتىماق كەپىلى»، «بىرلىك– بەرەكە باستاۋى»، «قۇتتى بىلىكتەگى تۇتاستىق يدەيالوگياسى» تاقىرىپتارىندا زيالى قاۋىم وكىلدەرى بايانداما جاسادى. ايتا كەتسەك، يگى باسقوسۋ باس ءمۇفتي ناۋرىزباي قاجى تاعان ۇلىنىڭ ءدىني قىزمەت اياسىندا 2022 جىلدى «يسلام – ىنتىماقپەن بىرلىك ءدىنى» جىلى دەپ جاريالاعان باستاماسىنا وراي ۇيىمداستىرىلدى.