قاراشانىڭ 24-27 كۇندەرى ارالىعىندا قونايەۆ قالاسىنىڭ ماڭىندا مەملەكەت جانە قوعام قايراتكەرى دىنمۇحامەد احمەت ۇلى قونايەۆتىڭ 110 جىلدىعىنا وراي قۇسبەگىلىكتەن "سونار - 2022" رەسپۋبليكالىق اشىق ءتۋرنيرى ءوتتى.

تۋرنيردە قازاقستان سپورتشىلارىنان بولەك، قىرعىزستان، تۇركيا، جۇڭگو جانە موڭعوليا ەلدەرىنىڭ قۇسبەگىلەرى ءوزارا ب ا ق سىناستى.

بۇل دوداعا جالپى سانى 19 كوماندا، 100-گە جۋىق سپورتشى، 64 بۇركىت، 14 قارشىعا، 10 شاقتى يتەلگى قاتىستى.

ۇلتتىق سپورت ۇلىقتالعان شارانىڭ فينالدىق كەزەڭىندە الماتى وبلىسى اكىمىنىڭ مىندەتىن اتقارۋشى مارات سۇلتانعازييەۆ، ۇلتتىق جانە ات سپورتى تۇرلەرى ورتالىعىنىڭ ديرەكتورى باقداۋلەت ءسابيتوۆ، "حابار" مەدياحولدينگىنىڭ باسقارما ءتوراعاسى بەرىك ءۋالي، "قىران فەدەراسياسى" قوعامدىق قورىنىڭ پرەزيدەنتى نۇرلان ونەربايەۆ، "قىران فەدەراسياسى" قوعامدىق قورىنىڭ اتقارۋشى ديرەكتورى باعدات مۇپتەكە قىزى بوي كورسەتىپ، جەڭىمپازداردى ماراپاتتادى.

"تۇركى حالىقتارىنىڭ ءداستۇرىن ساقتاپ، جالعاستىرۋشى سپورتشىلار، ۇلتتىق ويىندى دارىپتەۋگە ۇلەس قوسىپ جۇرگەن قوناقتار قونايەۆ قالاسىنا قوش كەلدىڭىزدەر! جاڭادان وبلىس ورتالىعى اتانعان قونايەۆ قالاسىنا ءمان بەرىپ، بۇگىنگى شارانى قولداعانداردىڭ بارىنە العىس ايتامىن! بيىل تۇركيادا وتكەن "كوشپەندىلەر ويىنى" 2024 جىلى الماتى وبلىسىندا وتەدى. بۇل دا ءبىز ءۇشىن ۇلكەن قۋانىش"،- دەدى قۇتتىقتاۋ سوزىندە وبلىس اكىمىنىڭ مىندەتىن اتقارۋشى مارات سۇلتانعازييەۆ.

سونىمەن قاتار ول جوعارىدا ەسىمى اتالعان قۇرمەتتى قوناقتارعا الماتى وبلىسىندا سپورتتى دامىتۋعا قوسقان ۇلەسى ءۇشىن العىس حات تابىس ەتتى.

ال "قىران فەدەراسياسى" قوعامدىق قورىنىڭ پرەزيدەنتى نۇرلان ونەربايەۆ بولسا "حابار" مەدياحولدينگىنىڭ باسقارما ءتوراعاسى بەرىك ۋاليگە فەدەراسيا اتىنان ارنايى دايىندالعان ساداقتى سىيلادى.

"سونار" جارىسى 23 جىل بويى الماتى وبلىسى اۋماعىندا وتكىزىلىپ، بيىل وبلىس تۋى قونايەۆ قالاسىنا تىگىلدى. ءوزىنىڭ ەنشىلەس سايىسىن ءوز جەرىندە وتكىزۋ - قۇپتارلىق جاعداي"،- دەدى نۇرلان ونەربايەۆ.

تىلشىلەرگە سۇحبات بەرگەن قۇسبەگىلىك سپورتىنان الماتى وبلىسىنىڭ اعا جاتتىقتىرۋشىسى ەلتاي جۇماعۇل ۇلى بيىلعى "سونار"-دىڭ ەرەكشەلىگى - اڭعا رۇقسات ەتىلىپ، قىران مەن تازىلاردىڭ تۇلكى الۋى ەكەنىن ايتتى.

شارانىڭ رەسمي بولىمىنەن سوڭ فينالعا وتكەن 7 بۇركىت "ۋاقىتقا تازى الۋ" ويىنى بويىنشا كىم جىلدام ەكەنىن انىقتادى. بۇدان بولەك، جەر-جەردىڭ مەرگەندەرى ساداق اتىس ويىنىن وتكىزىپ، تازىلار "اڭ اۋلاۋدا” ءوزارا بايگەگە ءتۇستى.

ناتيجەسىندە باسقا قىرانداردان ەرەكشە قالقىپ ۇشىپ، تۇلكىنى جىلدام العان استانالىق كۇنتۇعان سەرىكبەكتىڭ بۇركىتى جەڭىمپاز اتاندى. بۇركىتتىڭ باپكەرىنە التىن مەدال، كۋبوك، 1 ميلليون تەڭگە اقشالاي سەرتيفيكات تابىستالدى.

باس جۇلدەدەن بولەك، ءى جانە ءىى ورىن يەلەنگەن ويىنشىلار دا ءتيىستى دارەجەلى سىيلىقتارمەن، گراموتالارمەن، اقشالاي سەرتيفيكاتپەن ماراپاتتالدى.

ولاردىڭ ءتىزىمى كەلەسىدەي:

"بۇركىت" بويىنشا:

2 ورىن - اكىمبەكوۆ جالعاس، جامبىل وبلىسى؛
3 ورىن - قۇرمانعالييەۆ اقبەرگەن، الماتى قالاسى؛
4 ورىن - تاڭاتوۆ عابيت، الماتى قالاسى؛
5 ورىن - سەيتجايەۆ الماس، الماتى وبلىسى.

"قارشىعا" بويىنشا:

1 ورىن - سەيتجان بەكسۇلتان، الماتى وبلىسى؛
2 ورىن - ابدىكەرىم ۇلى يمانعالي، اتىراۋ وبلىسى؛
3 ورىن - بەكمۇحان ايدار، الماتى وبلىسى.

"سۇڭقار" بويىنشا:

1 ورىن - شامۋراتوۆ باقىت، قىرعىزستان؛
2 ورىن - وسپانقۇلوۆ تانات، قاراعاندى وبلىسى؛
3 ورىن - بەيشەبەكوۆ نۇرسەيىت، قىرعىزستان.

"قۇماي تازى" جارىسى بويىنشا:

1 ورىن - بۋرالقييەۆ ءجۇرسىن، الماتى قالاسى؛
2 ورىن - كۋردجيدي نەستەر، الماتى وبلىسى؛
3 ورىن - نۇرمۇحان ءبىرجان، الماتى قالاسى.

اقەركە جۇماعازى قىزى