پرەزيدەنتتى ۇلىقتاۋ ءراسىمى ءوتىپ، ق.توقايەۆ رەسمي تۇردە 7 جىلدىق مەرزىمىنە كىرىستى.

كونستيتۋسيانىڭ 42-بابىنا سايكەس، قاسىم-جومارت توقايەۆ قازاقستان حالقىنا انت بەردى.

– قازاقستان حالقىنا ادال قىزمەت ەتۋگە، قازاقستان رەسپۋبليكاسىنىڭ كونستيتۋسياسى مەن زاڭدارىن قاتاڭ ساقتاۋعا، ازاماتتاردىڭ قۇقىقتارى مەن بوستاندىقتارىنا كەپىلدىك بەرۋگە، قازاقستان رەسپۋبليكاسى پرەزيدەنتىنىڭ وزىمە جۇكتەلگەن مارتەبەلى مىندەتىن ادال اتقارۋعا سالتاناتتى تۇردە انت ەتەمىن!، – دەدى ول.

پرەزيدەنت ۇلىقتاۋ راسىمىندە سايلاۋداعى جەڭىستى تويلاۋعا ۋاقىت جوعىن، الدا اتقارىلۋعا ءتيىس شارۋا كوپ ەكەنىن جەتكىزىپ، بىردەن بىرنەشە جارلىققا قول قوياتىنىن ءمالىم ەتتى.

ارتىنشا اقوردانىڭ باسپا ءسوز قىزمەتى پرەزيدەنت قول قويعان جارلىقتاردى جاريالادى:

♦«قازاقستان رەسپۋبليكاسىنىڭ اۋىلدىق اۋماقتارىن دامىتۋدىڭ 2023-2027 جىلدارعا ارنالعان تۇجىرىمداماسى تۋرالى» جارلىق.

♦«قازاقستان رەسپۋبليكاسى پرەزيدەنتىنىڭ «ادىلەتتى قازاقستان: ءبارىمىز جانە ءارقايسىمىز ءۇشىن. ءقازىر جانە ءاردايىم» سايلاۋالدى باعدارلاماسىن ىسكە اسىرۋ جونىندەگى شارالار تۋرالى» جارلىق.

♦ «زاڭسىز شىعارىلعان اكتيۆتەردى مەملەكەتكە قايتارۋ جونىندەگى شارالار تۋرالى» جارلىق.

♦«قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋدى 2023 جىلعى 14 قاڭتارعا تاعايىنداۋ تۋرالى» جارلىق.

♦ «قازاقستان رەسپۋبليكاسى جوعارى اۋديتورلىق پالاتاسىنىڭ كەيبىر ماسەلەلەرى تۋرالى» جارلىق.

♦«قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ باسشىلارى تۋرالى» جارلىق.

♦«استانا، الماتى، شىمكەنت قالالارىنىڭ جانە وبلىستاردىڭ اكىمدەرى تۋرالى» جارلىق.