الماتىدا «OrdaGen» الەۋمەتتىك-تانىمدىق جوباسىنىڭ «ونىڭ اتى – ايبار» اتتى مۋلتحيكاياسىنىڭ جابىق كورسەتىلىمى ءوتتى.
“ونىڭ اتى – ايبار” 2 D مەن 3D فورماتىندا تۇسىرىلگەن ەلىمىزدەگى تۇڭعىش مۋلتسەريال. سەريال OrdaGen جوباسىنىڭ YouTube ارناسىندا بالالارعا تەگىن تاراتىلادى.
بالالارعا ارنالعان بۇل جوبا 10 سەريالدان تۇرادى. ۇزاقتىعى – 5-7 مينۋت. باستى كەيىپكەرى – ايبار اتتى قاسقىر. ول ءوزىنىڭ شىمىر، مومىن، بارىس، ەركە سىندى دوستارىمەن بىرگە ءتۇرلى وقيعانى باسىنان كەشىرەدى. اۆتورلار ءار سەريالدا وقيعانى قىزىق ەتۋمەن قاتار، قۇندى اقپارات جەتكىزۋگە تىرىسقان. ماسەلەن ءبىر بولىمىندە شاحمات ويىنى تۋرالى مالىمەت بەرىلسە، ەندى ءبىر سەرياسىندا قاعازدان ۇشاق جاساۋدى ۇيرەتەدى.
اتالمىش تۋىندىنىڭ يدەيا اۆتورى – ايبەك قۋاتباي. ال جوبا جەتەكشىسى – پاراسات تانەن. مۋلتسەريالعا رەجيسسەرلىك ەتكەن – جاس انيماتور-رەجيسسەر ديدار نۇرلايەۆ. ال سەنارييىن شىڭعىسحان ەرماحان جانە سەنبەك رۋسلان اتتى جاس قالامگەرلەر جازعان.
مۋلتحيكايا جاساۋ – قىزىعى مەن قيىندىعى قاتار جۇرەتىن پروسەسس. كورەرمەن نازارىنا ۇسىنۋ ءۇشىن بىرنەشە كەزەڭنەن وتەتىنىن بىرەۋ بىلسە، بىرەۋ بىلمەس. اتالمىش تۋىندىنىڭ رەجيسسەرى ديدار نۇرلايەۆ وسى جايىندا ايتىپ بەردى.
– بۇل مۋلتحيكايا – 2 d مەن 3 d فورماتتارىنىڭ بىرىككەن ءتۇرى. كومانداداعى باس انيماتورىمىز رۋسلان كەيىپكەرلەردى 2 d فورماتتا جاساپ شىعاردى. ال 3 d سۋرەتشىمىز مادي قورشاعان ورتانى 3 d تۇردە ىستەدى. وسى 2 d مەن 3 d اتتى ەكى الەمدى ارالاستىرعاننىڭ ارقاسىندا كومبو ستيل دايىن بولدى. سوڭعى ۋاقىتتا مۇنى شەتەل انيماتورلارى ءجيى قولدانىپ ءجۇر. 2 d كەيىپكەرلەردىڭ بەينەسىن جانسارا ديزاينەر الدىن الا جاساپ الدى. ول جانىنان، الدىنان، ارتىنان قاراعانداعى تۇر-الپەتىن سالىپ شىقتى. بويىن دا ولشەدى. سونداي-اق ءاربىر ءىس-قيمىلىن، ەموسياسىن، ميميكاسىن سىزبا تۇرىندە دايىنداپ قويدى. كەيىن رۋسلان وزىنە كەرەك بەينەنى الىپ، قوزعالىسقا ءتۇسىردى. ول Moho دەگەن باعدارلامادا جانسايا سالعان سۋرەتتەرگە جان ءبىتىردى. سودان سوڭ دايىن بولعان انيماسيانى Blender اتتى باعدارلاماعا كوشىردىك، – دەدى ول.
جوبا جەتەكشىسى پاراسات تانەن بۇعان دەيىن دە بالالارعا ارنالعان كونتەنت بارىسىندا جۇمىس اتقارعان. ول OrdaGen جوباسى اياسىندا «Orda ەرتەگىلەرى» كىتابىن شىعاردى. سونداي-اق 1000-عا جۋىق ەرتەگىنى قامتىعان OrdaGen ءموبيلدى قوسىمشاسىن ۇسىندى. ەندى بالالار اۋديتورياسىن مۋلتسەريالمەن قۋانتىپ وتىر. ول بۇل مۋلتسەريال ءتىلىمىزدىڭ اياسىن كەڭەيتۋگە باعىتتالعانىن اتاپ ءوتتى.
– كەيبىر تۋعان-تۋىستارىم مەن دوستارىمنىڭ بالالارىنىڭ ءتىلى قازاق تىلىندە دۇرىس شىقپادى. ويتكەنى كورەتىندەرى – وزگە ەلدىڭ انيماسيالىق ونىمدەرى. ءوزىم دە اكە بولعاندىقتان، بالالارىمنىڭ بولاشاعى ءۇشىن ۋايىمدايمىن. العاش ايبەك قۋاتبايدان مۋلتفيلم ءتۇسىرۋ جايلى يدەيا كەلگەندە، ەرەكشە قۋاندىم. تەز ارادا كوماندا جاساقتاپ، جۇمىسقا كىرىسىپ كەتتىك، – دەيدى ول.
«OrdaGen» الەۋمەتتىك-تانىمدىق جوباسىنىڭ باسپا ءسوز قىزمەتى
پىكىر قالدىرۋ