پاۆلودار وبلىسى پوليسيا دەپارتامەنتىنىڭ ەكس-باسشىسى نۇرلان ءماسىموۆتىڭ ءىسى سوتقا جولداندى، دەپ حابارلادى سىبايلاس جەمقورلىققا قارسى ءىس-قيمىل اگەنتتىگى.
"پاۆلودار وبلىسى بويىنشا سىبايلاس جەمقورلىققا قارسى قىزمەت وبلىستىق پوليسيا دەپارتامەنتىنىڭ بۇرىنعى باستىعى پوليسيا گەنەرال-مايورى ن.ماسىموۆكە، ونىڭ ورىنباسارى د.سيرازيديموۆكە جانە كاسىپكەر ە.ەۆكوۆيچكە قاتىستى اۋىر جانە اسا اۋىر سىبايلاس جەمقورلىق قىلمىستار جاسادى دەگەن كۇدىكپەن سوتالدى تەرگەۋدى اياقتادى"، - دەلىنگەن حابارلامادا.
ۆەدومستۆو مالىمەتىنشە، ءماسىموۆ پەن سيرازيديموۆ مەملەكەتتىك ساتىپ الۋدى وتكىزۋ جانە ۇلەستەس كومپانيالارمەن كەلىسىمشارتتارعا قول قويۋ كەزىندە قامقورلىعى ءۇشىن 90،3 ميلليون تەڭگە سوماسىندا پارا الدى دەپ ايىپتالعان.
سونداي-اق ولار ارتتەحقارۋ-جاراق ساتىپ الۋعا ارنالعان 420 ملن تەڭگە سوماسىندا بيۋدجەت قاراجاتىن ۇرلادى دەپ كۇدىككە ىلىنگەن.
نۇرلان ءماسىموۆ – ۇقك-نىڭ بۇرىنعى ءتوراعاسى كارىم ءماسىموۆتىڭ نەمەرە ءىنىسى. رەسمي دەرەكتەر بويىنشا، 238 ادامنىڭ ءومىرىن قيعان قاڭتار وقيعاسىنان كەيىن ۇقك كوميتەتتىڭ بۇرىنعى ءتوراعاسى ءماسىموۆتى مەملەكەتكە وپاسىزدىق جاسادى دەگەن كۇدىكپەن قاماۋعا العان.
2022 جىلدىڭ ساۋىرىندە انتيكور پوليسيا گەنەرال-مايورى نۇرلان ماسىموۆكە قاتىستى سوتقا دەيىنگى تەرگەۋدى باستادى. ول اسا ءىرى كولەمدە پارا الدى دەگەن كۇدىككە ءىلىندى. ءماسىموۆ ەلدەن قاشپاق بولعان، ول جازدا جالعان قۇجاتتار ارقىلى رەسەي فەدەراسياسىمەن مەملەكەتتىك شەكارانى كەسىپ وتپەك بولعان كەزدە ۇستالعان.
پىكىر قالدىرۋ