الەۋمەتتىك تالاپتان باستالىپ، ساياسي سيپاتقا اۋىسقان حالىقتىڭ جاپپاي نارازىلىعى ارتى بۇلىككە اينالىپ، رەسمي دەرەككە ساي 238 ادامنىڭ ولىمىنە سوقتىرعان قاڭتار وقيعاسىنا ءبىر جىل. ءبىر جىل بۇرىن ءدال وسى 4 قاڭتاردا جاعداي سۇيىتىلعان گاز باعاسىنىڭ ارزانداۋىن تالاپ ەتكەن جاڭاوزەندىكتەر ساياسي تالاپتار ايتا باستاپ، ونى ايماقتار دا قولداپ اكەتتى.

2 قاڭتار. جاڭاوزەندىكتەر ماڭعىستاۋ وبلىسىندا "كوگىلدىر" وتىن باعاسى كەنەتتەن 60 تەڭگەدەن 120 تەڭگەگە دەيىن وسكەنىنە بەيبىت تۇردە نارازىلىق ءبىلدىرىپ، الاڭعا شىقتى. قۇزىرلى ورگان وكىلدەرى ادەتتەگىدەي ازاماتتارعا ارەكەتى بەيبىت جيىن ۇيىمداستىرۋ تۋرالى زاڭعا قايشى ەكەنىن ايتىپ، ولاردى تاراتۋعا تىرىستى. اكىمدىك وكىلدەرى جينالعاندارعا ءوز تالاپتارىن جازباشا تۇردە بايانداۋدى ۇسىنسا، ەنەرگەتيكا ءمينيسترلى گاز باعاسى نارىقتا قالىپتاسقان جاعدايعا جانە سۇرانىستىڭ كوبەيۋىنە بايلانىستى قىمباتتاعىنىن، باعا ەندى بۇرىنعى دەڭگەيگە قايتا كەلمەيتىنىن جەتكىزىپ، ءوز ۇستانىمىنان قايتپادى.

3 قاڭتار. الاڭعا جينالعاندار رايىنان قايتپاي، الاڭعا جۇرتشىلىق جيىلا بەردى. ىستىق تاماق، ءشاي اكەلىپ، تالاپ تولىق ورىندالمايىنشا تارامايتىنىن ناقتى جەتكىزدى. ماڭعىستاۋ وبلىسىنداعى الەۋمەتتىك-ەكونوميكالىق جاعدايدى قاراستىرۋ ءۇشىن ۇكىمەتتىك كوميسسيا قۇرىلىپ، ناتيجەسىندە بيزنەستىڭ الەۋمەتتىك جاۋاپكەرشىلىگى اياسىندا گاز قۇنىن ليترىنە 120 تەڭگەدەن 85-90 تەڭگەگە دەيىن تومەندەتۋ تۋرالى شەشىم قابىلداندى. حالىق بۇرىنعى باعانى تالاپ ەتىپ تۇرىپ الدى. سول ارالىقتا بيلىك جاڭاوزەنگە كىرەر جولداردى بوگەپ، كۇزەتتى كۇشەيتىپ، قالا اۋماعىندا ينتەرنەت پەن ۇيالى بايلانىس جۇمىسىن شەكتەدى. ميتينگكە شىققاندارعا ارانداتۋشىلىق دەگەن قۇقىقتىق باعا بەرە بەرىلە باستادى.

ال حالىق تولقۋى ۇدەي ءتۇسىپ، جاڭاوزەندىكتەردى قولداۋعا وزگە وڭىرلەر قوسىلدى.

الماتىدا ديسسيدەنت، اقىن ارون اتابەكتىڭ قازاسىنا 40 كۇن تولۋىنا وراي بەرىلگەن استان شىعىپ، جاڭاوزەن ازاماتتارىن قولداماق بولىپ ناۆوي كوشەسى بويىمەن شەرۋلەتكەن ءبىر توپ ادامدى پوليسيانىڭ ارنايى جاساعى ۇستاپ اكەتتى.

سول كۇنى ساياسي بەلسەندى جانبولات ماماي مەن ونىڭ جاقتاستارى ماڭعىستاۋ وبلىسىنداعى نارازىلىق اكسياسىنا قاتىسۋشىلاردى قولداپ، الماتى كوشەلەرىنە شىقتى.

4 قاڭتار. اقتاۋدا مىڭداعان ادام الاڭعا شىعىپ، حالىق نارازىلىعى ساياي رەڭك الا باستادى. جينالعاندار "شال كەت"، "ۇكىمەت وتستاۆكاعا كەتسىن" دەپ ۇرانداتا باستادى. Facebook-تە كەي قولدانۋشىلار الاڭداعى ادام سانى 10 مىڭنان اسىپ كەتكەنىن جازىپ جاتتى.

اتىراۋدا يساتاي مەن ماحامبەت ورتالىق الاڭدارىنا جينالعان مىڭداعان ازامات جاڭاوزەندىكتەرگە قولداۋ ءبىلدىرىپ، «شال كەت»، «باعا ارزانداسىن!» دەگەن تالاپتارىن جەتكىزدى. پوليسيا مەن ارنايى جاساق جولدى جاۋىپ تاستاعانىمەن، شەرۋشىلەر قورشاۋدى بۇزىپ ءوتتى. پوليسيا نارازىلىق بىلدىرۋشىلەردىڭ ءبىرىن ۇستاعاننان كەيىن نارازى حالىق پەن پوليسيا اراسىندا قاقتىعىس بولدى. ناتيجەسىندە اۆتوزاكتى توقتاتىپ، ىشىندەگى ۇستالعان ازاماتتاردى بوساتىپ الدى.

ۇكىمەتتىك كوميسسيا جاڭاوزەندە جەرگىلىكتى بەلسەندىلەرمەن كەلىسسوز جۇرگىزىپ، اقىرى حالىق تالابىنى قۇلاق استى. كوميسسيا مۇشەلەرى 4 قاڭتاردا كەشكە قاراي اقتاۋ قالاسىنداعى ىنتىماق الاڭىنا جينالعان بەلسەندىلەرمەن كەزدەسىپ ورتاق شەشىمدى جاريالادى. وعان ساي، "قازمۇنايگاز"ۇك اق الەۋمەتتىك جاۋاپكەرشىلىگى اياسىندا ماڭعىستاۋ وبلىسىندا سۇيىتىلعان گاز قۇنىن تومەندەتۋ جانە ليترىنە 50 تەڭگە باعاسىن بەلگىلەۋ تۋرالى شەشىم قابىلداندى. الاڭدا بولعان ادامداردى جاۋاپكەرشىلىككە تارتپاۋ تۋرالى كەپىلدىك بەرىلدى.

جاڭاوزەندىكتەردىڭ جەڭىسى ەل اۋماعىنىڭ باسىم بولىگىن شارپىعان نارازى كوڭىل-كۇيدى سەيىلتە المادى.

كەشكە قاراي الماتىدا مىڭداعان ازامات ماڭعىستاۋ وبلىسىنداعى حالىق نارازىلىعىنا قولداۋ رەتىندە الماتى-ارەنا سپورت كەشەنى ماڭىنا جينالا باستادى. پوليسيا الاڭعا جينالعان ءبىراز ازاماتتى ۇستاپ اكەتتى. ولاردىڭ قاتارىندا بەلگىلى جۋرناليست قاسىم امانجول، تىركەلمەگەن دەموكراتيالىق پارتيانىڭ جەتەكشىسى جانبولات ماماي بار بولاتىن. الايدا سپورت كەشەنى ماڭىنا جينالعان ادام ۇستى-ۇستىنە كوبەيىپ، ادام ءنوپىرى قالا اكىمدىگىنە قاراي جول تارتتى.

بەيبىت نارازىلىق بۇلىككە ۇلاسقان تۇس وسى 4 قاڭتاردان 5 قاڭتارعا قاراعان ءتۇن.