الماتىدا قازاقستاننىڭ رەسمي لاۋازىم يەلەرى ەلگە جۇمىس ساپارىمەن كەلگەن بريتان پارلامەنتارييلەرىمەن كەزدەسۋدەن باس تارتىپ، ولاردىڭ جانبولات مامايمەن جولىعۋىنا رۇقسات بەرمەۋىنە بايلانىستى جيىن ءوتتى.

 

قۇقىققورعاۋشى ينگا يمانباي تاراتقان اقپاراتقا ساي، بەلسەندى جانبولات مامايدىڭ نە ءۇشىن قامالعانىن تەكسەرۋ بويىنشا بريتان پارلامەنتارييلەرىنەن قۇرىلعان ۇكىمەتتىك ەمەس كوميسسيا قازاقستاندا ۇكىمەتتەگى رەسمي وكىلدەرمەن جانە تەرگەۋ بارىسىنداعى كۋاگەرلەرمەن كەزدەسۋدى جوسپارلاعان. الايدا 16 قاڭتار كۇنى كەشكە كوميسسياعا سەبەبى ەش تۇسىندىرىلمەستەن بارلىق رەسمي كەزدەسۋلەر وتپەيتىنى جانە جانبولات مامايمەن كەزدەسۋگە بەرىلگەن رۇقسات كۇشىن جوياتىنى تۋرالى حابارلاما كەلگەن.

 

– بۇرىنىراق قازاقستاننىڭ لوندونداعى ەلشىسى كوميسسيانىڭ قازاقستانعا ساپارىن ءبارى قۇپتايدى جانە بيلىك جوعارى دەڭگەيدە سەرىكتەستىك تانىتۋعا دايىن دەپ ءبىزدى سەندىرگەن بولاتىن. ءبىز قازاقستانعا كەلگەنىمىزبەن، ۇكىمەت پەن قۇقىق قورعاۋشى ورعاندار باسشىلىعىمەن جوسپارلانعان كەزدەسۋلەرىمىزدى، ەش سەبەبىن تۇسىندىرمەستەن، قىسقا حابارلاما عانا جىبەرىپ، بولدىرماي تاستادى. ءبىزدى بارىنشا مازالايتىن تاعى ءبىر فاكت، ول ەرتەرەكتە ءبىزدىڭ ماماي مىرزامەن كەزدەسۋىمىزگە رۇقسات بەرگەن سوت، ءوزىنىڭ ول شەشىمىنەن باس تارتتى. مۇنىسى قازاق بيلىگىنىڭ تالابىن ورىنداعانى بولار دەپ ويلايمىز. ءبىز بۇل ارەكەتتەردى ءوزىمىزدى سىيلاماعاندىق دەپ سانايمىز. سوعان قاراماستان، ءبىز قازاق ازاماتتىق قوعامىنىڭ وكىلدەرىمەن، 2022 جىلعى قاڭتار وقيعاسىنىڭ كۋاگەرلەرىمەن، سونىمەن بىرگە، ماماي مىرزانى قاماۋعا العان جانە ونىڭ قاماۋدا وتىرعانى بويىنشا ءىستىڭ كۋاگەرلەرىمەن كەزدەسۋلەرىمىزدى جالعاستىرىپ جاتىرمىز جانە وسى ىستەر جونىندەگى وزىمىزگە قاجەت دالەل-دايەكتەر قولىمىزعا ءتيىپ جاتىر. قازاق بيلىگىنىڭ مۇنداي ارەكەتتەرىنە قاراماستان، ءبىز ءوز جۇمىسىمىزدى سوڭىنا دەيىن جەتكىزىپ، ماماي مىرزاعا قاتىستى ناقتى دالەلدەرگە سۇيەنە وتىرىپ جاسالعان تاۋەلسىز ەسەبىمىزدى دايىنداپ شىعامىز. مەن ءوزىمىزدى قازاقستاندا كۇتىپ الىپ، بيلىك سياقتى ەمەس، كەرىسىنشە ءبىزدىڭ تەرگەۋ-تەكسەرۋ جۇمىسىمىزعا بارىنشا سەبىن تيگىزگەن بارشا جانعا العىسىمدى بىلدىرەمىن، – دەدى كوميسسيا ءتوراعاسى لورد ماكدونالد.