ماجىلىستە پرەمەر-مينيسترىنىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين “قازاقستان رەسپۋبليكاسىنىڭ كەيبىر زاڭنامالىق اكتىلەرىنە استانانى جانە رەسپۋبليكالىق ماڭىزى بار قالالاردى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى” ءبىرىنشى وقىلىمدا تانىستىردى.
زاڭ جوباسى قالالاردىڭ ءبىرىڭعاي ساۋلەتتىك كەلبەتتى كورىنىسىن قالىپتاستىرۋدى كوزدەيدى.
جۇمانعارين قازىرگى ۋاقىتتا قالالاردىڭ ساۋلەتتىك كەلبەتى تەك سىرتقى جارناما ارقىلى عانا ەمەس ماڭدايشالاردىڭ دا رەتسىز ورنالاسۋىنا بايلانىستى ناشارلاپ بارا جاتقانىن ايتتى.
سىرتقى جارنامانى جولدار مەن كوشەلەردى بوياۋ ارقىلى ورنالاستىرۋ دا قالالاردىڭ ەستەتيكالىق كەلبەتىنە تەرىس اسەر ەتەدى. سونىمەن قاتار قالانىڭ سىرتقى كەلبەتىنىڭ ناشارلاۋىنا قوعامدىق ورىنداردا اۋديو جارنامانىڭ كەڭ تارالۋى سەبەپ بولىپ وتىر. بۇگىنگى تاڭدا اتالعان ارەكەتتەر زاڭ بۇزۋشىلىققا جاتپايدى جانە زاڭنامادا ەشقانداي اكىمشىلىك شارالار كوزدەلمەگەن، - دەيدى ول.
زاڭ جوباسىندا قانداي وزگەرىستەر دايىندالدى:
- رەسپۋبليكالىق ماڭىزى بار قالالاردىڭ، استانانىڭ ستيليستيكالىق ءبىرىڭعاي ساۋلەتتىك كەلبەتىن قالىپتاستىراتىن ديزاين-كودتى، سونداي-اق ستاسيونارلىق ەمەس وبەكتىلەردى ورناتۋ مەن جۇمىس ىستەۋى بويىنشا قاعيدالاردى بەكىتۋ؛
- ەلوردادا ءبىرىڭعاي ديزاين-كودتى ەنگىزۋ جانە ونىڭ جالپى ەرەجەلەرىن ايقىنداۋ؛
- عيماراتتاردىڭ مەنشىك يەلەرىنە تالاپتارعا سايكەس ەمەس ورناتىلعان جارناما وبەكتىسىنە دەمونتاج جاساۋ جونىندەگى شارتتاردى قولدانۋ؛
- اشىق كەڭىستىكتە اۋديو جارنامانى تاراتۋعا تىيىم سالۋ؛
- تروتۋارلاردا، ۆەلوجولداردا، اۆتوجولداردا جانە كوشەلەردە سىرتقى (كورنەكى) جارنامانى ورنالاستىرۋعا تىيىم سالۋ ۇسىنىلادى.
سونىمەن قاتار، اتالعان نورمالاردى اكىمشىلىك قۇقىقبۇزۋشىلىق تۋرالى كودەكسىنە (455-باپ) ەنگىزۋ ماسەلەسى پىسىقتالىپ جاتىر.
پىكىر قالدىرۋ