پرەزيدەنت ق.توقايەۆ جامبىل وبلىسىنا جاساعان ساپارىندا قولونەرشىلەر كورمەسىنە بارىپ، قامشى ساتىپ الدى. بۇل تۋرالى اقوردانىڭ باسپا ءسوز قىزمەتى حابارلادى.

كورمەگە 29 قولونەر شەبەرىنىڭ اعاش، تەرى جانە كيىزدەن جاساعان بۇيىمدارى، قىش ىدىستار، پاننو، ۇلتتىق مۋزىكالىق اسپاپتار، ۇلتتىق كيىم ۇلگىلەرى، ات ابزەلدەرى، زەرگەرلىك بۇيىمدار قويىلعان.

ق.توقايەۆقا كورسەتىلگەن «كيىز ءۇي» ينستاللياسياسىندا جاستارعا توقىما، كيىز باسۋ، قۇراق قۇراۋ، ۇرشىق ءيىرۋ، سىرماق سىرۋ جانە باسقا دا ونەر تۇرلەرى بويىنشا شەبەرلىك ساباعى وتكىزىلدى.

پرەزيدەنت كورمەنى ارالاي ءجۇرىپ، جامبىلدىق قولونەرشىلەر جاساعان قامشى ساتىپ الدى. مەملەكەت باسشىسىنا قامشىنى جامبىل وبلىسى قولونەرشىلەر وداعىنىڭ ءتوراعاسى سەرىك ىقىلاس ۇلى تابىس ەتتى.

قامشى – كوشپەلى ءومىر سالتىنىڭ اجىراماس ءبىر بولىگى. قازاق ونى قاستەرلەپ، كيە تۇتقان. قامشىنى تەك قانا قۇرال ەمەس، بيلىك پەن رۋحتىڭ، قايرات پەن كۇشتىڭ سيمۆولى دەپ بىلگەن.