قور مالىمەتىنشە، العاشقى مينۋتتا پورتالداعى قولدانۋشىلار سانى 125 مىڭ ادامدى قۇراپ، ليميت 18 سەكۋندتا تولىپ كەتكەن. پورتال جۇيەسى تۇسكەن جۇكتەمەنى كوتەرگەن. تەك 761 ادامنان قۇجات قابىلدانعاننان كەيىن ءوتىنىم قابىلداۋ اۆتوماتتى تۇردە جابىلعان.
كەلەسى ءوتىنىم ناۋرىز ايىندا، ودان كەيىن اي سايىن قابىلدانادى دەپ كۇتىلىپ وتىر.
بۇگىن جىلىنا 4 پايىزبەن اۆتونەسيەلەۋ باعدارلاماسىنا ءوتىنىم قابىلدايتىن پورتال ىسكە قوسىلماي جاتىپ، ىستەن شىقتى. پورتال ارقىلى 10:00-دەن باستاپ ءوتىنىم قابىلداۋ باستالۋى كەرەك بولعان. الايدا قولدانۋشىلار پروسەدۋرالاردا قاتە شىعىپ جاتقانىن، كەيدە ءتىپتى كەي وپەراسيالار مۇلدە جوعالىپ كەتكەنىن ايتادى.
ال كەي قولدانۋشىلار 10:00-دە كىرگەننىڭ وزىندە ءوتىنىم قابىلداۋعا ليميت تاۋسىلىپ قالاعانى جازىلعان تەرەزە شىعىپ، كوماندانى جالعاستىرۋ مۇمكىن بولماعان.
پورتالعا تەك 761 ادام ءوتىنىم قالدىرا الادى. ويتكەنى بۇل جولعى باعدارلاما بيۋدجەتى وسىعان دەيىن كولىك العان ازاماتتاردىڭ اي سايىنعى تولەمىنەن جينالعان سوماعا تەڭ. بۇگىندە كرەديت تولەمدەرى بويىنشا 7،6 ملرد تەڭگە جينالعان، ول 761 ادامدى قامتيدى دەپ بولجانىپ وتىر.
الەۋمەتتىك جەلىدە پورتال جۇمىسىنىڭ كىدىرىستى كوزبوياۋشىلىققا ساناپ، جەڭىلدەتىلگەن نەسيە ءتىزىمى الدەقاشان جاسالىپ قويىلعان دەپ تۇسپالداپ جاتقاندار كوپ.
پىكىر قالدىرۋ