تۇركياداعى افون قالاسىندا ءبىلىم الىپ جاتقان قازاقستاندىق ستۋدەنت تاسنيم نىعمەتۋلا جويقىن جەر سىلكىنىسىنەن كەيىن جەرگىلىكتى حالىقتىڭ كوبى قورىققاننان ۇيىنە كىرە الماي جۇرگەنىن ايتتى. 

"كەشەگى ءتۇن ءبىز ءۇشىن وتە اۋىر بولدى. جەر سىلكىنىسى بولۋى مۇمكىن دەگەن دابىل قاعىلدى. ءتۇنىمىز قورقىنىشپەن، ۇرەيمەن ءوتتى. ءبارىمىز دالاعا شىعىپ كەتتىك. ءتۇنى بويى 1 قاباتتى كافەلەردە قوندىق. ازىرگە ءبارى تىنىش"، دەيدى قازاقستاندىق ستۋدەنت. 

ونىڭ ايتۋىنشا، تۇركياداعى اكىمشىلىك قىزمەتكەرلەرى "تۇنىمەن ۇيقتاماڭىزدار، ساقتانىپ وتىرىڭىزدار" دەپ ەسكەرتكەن. 

"باسقا قالالاردا جاعداي وتە اۋىر. ال ءبىز تۇراتىن جەردە ءزىلزالا بولمادى. تەك ەسكەرتۋ جاسالدى. اكىمشىلىك قىزمەتكەرلەرى "تۇنىمەن ۇيىقتاماڭىزدار، ساقتانىپ وتىرىڭىزدار"، دەدى. ءوزىمىز كەرەك-جاراعىمىزدى دايىنداپ، جيناپ قويدىق. كەشە اياق استىنان كۇن سۋىتىپ، بوران بولدى. حالىقتىڭ كوبى قورقىپ، دالادا ءجۇردى"، دەيدى تاسمين نىعمەتۋلا. 

قازاقستاندىق ستۋدەنت قازاقستانعا ورالۋدى ويلاپ وتىرعانىن جەتكىزدى، الايدا ازىرگە ناقتى شەشىم قابىلداماعان. جاعداي تۇراقتالسا وقۋىن جالعاستىرۋدى جوسپارلاپ وتىر.

تۇركيانىڭ وڭتۇستىگى مەن سيريانىڭ سولتىستىگىندە بولعان قۋاتتى ءزىلزالا قۇرباندارى ءسات سايىن ارتىپ جاتىر. سوڭعى دەرەككە ساي، جەر سىلكىنىسىنەن تۇركيادا 3400-دەن اسا ادام قازا تاپقان. 20426 ادام جاراقات الىپ، 7840 ادام ءۇيىندى استىنان قۇتقارىلعان. سيريادا 1602 ادام مەرت بولعان. تۇركيانىڭ بىرنەشە قالالارىندا جەر سىلكىنىسى قايتالانۋى مۇمكىن ەكەنىن جونىندە ەسكەرتۋ دابىلى قاعىلعان. قۇتقارۋ جۇمىستارى جالعاسىپ جاتىر.