تۇرىك سەيسمولوگى دوگان پەرينچەك داردانەلل بۇعازىنىڭ جاعاسىنداعى پورتتى قالا چاناككالە ايماعىندا 7 بالدىق ءزىلزالا بولۋى مۇمكىن ەكەنىن ايتتى، دەپ جازادى ريا نوۆوستي.
ونىڭ سوزىنشە، وڭتۇستىك-شىعىستاعى جەر سىلكىنىستەرى وتە ۇلكەن اۋماق – 470 شاقىرىمدى قامتىعان. ال افتەرشوكتار نەگىزگى دۇمپۋمەن تەڭەسىپ، ماگنيتۋداسى 6،6-عا جەتكەن.
"سوڭعى 10 كۇندە ءمارمار تەڭىزىنەن چاناككالەدەگى سەيسميكالىق بەلسەندىلىكتىڭ جوعارىلاۋىن بايقادىم. 10 جىلدان استام ۋاقىت بويى ارنايى كارتالار ارقىلى ەلدەگى سەيسميكالىق بەلسەندىلىكتى كۇندەلىكتى باقىلاۋ جانە تالداۋمەن اينالىسىپ كەلەمىن. 3 جىلدان بەرى چاناككالەدە جەر سىلكىنىسى بولادى دەپ بولجاپ ءجۇرمىن" دەدى عالىم.
ول بۇل ايماقتا شامامەن 250 جىلدا ءبىر رەت وتەتىن جارىلىس ماگنيتۋداسى قۋاتى 7 بالدىق جەر سىلكىنىسىنە سەبەپ بولاتىنىن اتاپ ءوتتى.
"بۇل ايماقتا شامامەن 250 جىلدا ءبىر رەت بولاتىن جەر سىلكىنىسى شامامەن 7 بالدىق ءدۇمپۋدى تۋدىرادى. بۇل – سوڭعى رەت 287 جىل بۇرىن بولعان. ۋاقىت كەلدى، كەز كەلگەن ۋاقىتتا وندا ءدۇمپۋ باستالۋى مۇمكىن" دەيدى سەيسمولوگ.
تۇركيا مەن سيرياداعى جويقىن جەر سىلكىنىسىنەن قازا تاپقاندار سانى 12 مىڭ ادامنان اسىپ كەتتى. ادامدار ءۇيىندى استىندا جاتقانىنا ءۇشىنشى كۇن بولعاندىقتان، قۇرباندار سانى ءالى دە ارتا تۇسەدى دەگەن بولجام بار.
پىكىر قالدىرۋ