2023 جىلعى 1 قاڭتارداعى جاعداي بويىنشا ەلدەگى حالىق سانى 19 765 004 ادامدى قۇرادى، ونىڭ ىشىندە قالا تۇرعىندارى – 12 208 259، اۋىل تۇرعىندارى – 7 556 745 ادام. بۇل تۋرالى ۇلتتىق ستاتيستيكا بيۋروسى حابارلادى.

12 اي ىشىندە قازاقستاندا 403،5 مىڭ ءسابي (450،7 مىڭ ادام – 2021 ج) دۇنيەگە كەلگەن، ونىڭ ىشىندە 208 مىڭى – ۇلدار، 195،5 مىڭى – قىزدار. تۋۋ كوەففيسيەنتى 1000 ادامعا 20،28 قۇرادى. اتالعان كەزەڭدە قايتىس بولعاندار سانى 134،7 مىڭ ادامدى قۇرادى، بۇل رەتتە 1000 ادامعا شاققانداعى ءولىم-جىتىم كوەففيسيەنتى – 6،77. وسىلايشا، حالىقتىڭ تابيعي ءوسىمى 2022 جىلدىڭ 12 ايىندا 268،8 مىڭ ادامدى قۇرادى (2020ج. – 263 مىڭ، 2021 ج. – 267 مىڭ).

تۋۋدىڭ ەڭ جوعارى دەڭگەيى ماڭعىستاۋ (1000 تۇرعىنعا 27،75 ادام)، تۇركىستان وبلىستارىندا (1000 تۇرعىنعا 27،23 ادام) جانە شىمكەنت قالاسىندا (1000 تۇرعىنعا 26،34 ادام) بايقالدى.

ءولىم-جىتىمنىڭ ەڭ جوعارى دەڭگەيى سولتۇستىك قازاقستان (1000 تۇرعىنعا 11،84)، شىعىس قازاقستان (1000 تۇرعىنعا 11،71) جانە قوستاناي وبلىستارىندا (1000 تۇرعىنعا 10،82) بايقالدى، بۇل وسى وبلىستار حالقىنىڭ جاس قۇرىلىمىنا بايلانىستى.

اتالعان كەزەڭدە 128،5 مىڭ نەكە، 17،7 مىڭ اجىراسۋ تىركەلگەن.

ەل ىشىندە كوشىپ-قونۋشىلار سانى 6،1%-عا ءوستى. ءوڭىرارالىق كوشى-قون بويىنشا ەلىمىزدىڭ 4 وڭىرىندە: الماتى (35 302 ادام)، استانا (33 798 ادام)، شىمكەنت (2 756 ادام) قالالارىندا جانە الماتى وبلىسىندا (898 ادام) حالىقتىڭ كوشى-قونىنىڭ وڭ سالدوسى قالىپتاستى.

2022 جىلعى قانتار-جەلتوقساندا ەلگە كەلگەندەر سانى 17 293 ادام، ەلدەن كەتكەندەر سانى  24 239 ادامدى قۇرادى. كوشى-قون سالدوسى –  -6 946 ادام. 2021 جىلعى ءتيىستى كەزەڭمەن سالىستىرعاندا قازاقستانعا كەلۋشىلەر سانى 57،5%-عا ءوستى، كەتكەندەر سانى 24،7%-عا ازايدى.

ەلدەگى نەگىزگى كوشى-قون الماسۋى تمد مەملەكەتتەرىمەن ءجۇردى. تمد ەلدەرىنەن كەلگەندەردىڭ ۇلەسى 85،9%، ال بۇل ەلدەرگە كەتكەندەردىڭ ۇلەسى 83،4% قۇراڭان.