قۇرىلىس سالاسىنداعى وتاندىق وندىرۋشىلەر يمپورتتى ىعىستىرىپ جاتىر. الايدا يمپورتتى الماستىرۋ پروسەسىمەن باعانىڭ كۇرت ءوسۋى قاتار ءجۇرىپ كەلەدى، دەپ جازادى energyprom.kz پورتالى.
2022 جىلى قۇرىلىس ماتەريالدارىن شىعاراتىن قازاقستاندىق كومپانيالار ءوندىرىس ءوسىمى بويىنشا الدىڭعى جىلعى تابىستى قايتالاي الماعان. ونەركاسىپتەگى ءونىمىنىڭ ناقتى كولەم يندەكسى وتكەن جىلدىڭ جەلتوقسان ايىندا 101،3%-دى قۇراسا، 2021 جىلدىڭ 12 ايىنىڭ قورىتىندىسى بويىنشا كورسەتكىش 109،8%-عا جەتكەن. الايدا سالاداعى مۇنداي جوعارى ءوندىرىس كورسەتكىشتەرى سوڭعى رەت 2013 جىلى عانا تىركەلگەن.
قازاقستاندا قۇرىلىس ماتەريالدارىن ءوندىرۋ كولەمى العاش رەت تريلليوندىق مەجەدەن استى. دالىرەك ايتقاندا، جالپى ءونىم كولەمى 1،13 ترلن تەڭگەنى قۇرادى، بۇل – 2021 جىلمەن سالىستىرعاندا قۇندىق ماندە 230،7 ملرد تەڭگەگە (نەمەسە 25،6%) ارتىق.
2022 جىلى ەلدە وتقا ءتوزىمدى ەمەس كەراميكالىق كىرپىش (64،3%)، سيليكات جانە قوج (شلاك) كىرپىش (18%)، سەمەنتتەن، بەتوننان نەمەسە تاستان جاسالعان پليتكا (16،9%) ءوندىرىسى ايتارلىقتاي قىسقارسا، قۇرىلىس ەرىتىندىلەرى (25،1%)، ارلەۋ تاستارى (7،8%)، گيپس (26،6%) جانە ءارتۇرلى وتقا ءتوزىمدى قۇرىلىس بۇيىمدارى (38%) ءوندىرىسىنىڭ كولەمى ۇلعايا تۇسكەن.
2022 جىلدىڭ قاڭتار-قاراشا ايلارىندا "QazIndustry قازاقستاندىق يندۋستريا جانە ەكسپورت ورتالىعى" اق ساراپشىلارى وتاندىق وندىرۋشىلەردىڭ ىشكى نارىقتاعى ۇلەسىن 66% دەپ باعالادى. بۇل 2021 جىلدىڭ سايكەس كەزەڭىمەن سالىستىرعاندا 8 پايىزعا ارتىق. ۇيىم ماماندارى ەكىنشى جىل بويى قازاقستاندىق وندىرۋشىلەردىڭ ەل ىشىندەگى نارىقتاعى ۇلەسىنىڭ ارتقانىن اتاپ ءوتتى.
"قۇرىلىس ماتەريالدارىنىڭ باعاسى 2021 جىلدىڭ ماۋسىمىندا ايتارلىقتاي ءوستى. سوندا وڭدەۋشى كاسىپورىنداردىڭ باعا يندەكسى 106،9%-دى قۇرادى. ەڭ جوعارى كورسەتكىشكە 2022 جىلدىڭ مامىر ايىندا 112،3%-عا جەتتى. 2022 جىلدىڭ ەكىنشى جارتىسىندا ديناميكا ازداپ تومەندەدى، ءبىراق باعانىڭ ءوسۋى بۇرىنعىسىنشا ساقتالدى (107،3%–111%). قۇرىلىس ماتەريالدارىنىڭ قىمباتتاۋى باسقا ينفلياسيالىق فاكتورلارمەن قاتار جاڭا عيماراتتارداعى تۇرعىن ءۇي باعاسىنا دا اسەر ەتتى. 2022 جىلى ءبىر شارشى مەتر تۇرعىن ءۇي قۇرىلىسىنا ورتاشا ناقتى شىعىن 129،1 مىڭنان 148،7 مىڭ تەڭگەگە دەيىن ءوستى. بۇل سوڭعى بەس جىلداعى باعانىڭ ەڭ ۇلكەن سەرپىنى"
پىكىر قالدىرۋ