ەكس پرەزيدەنت نۇرسۇلتان نازاربايەۆ امەريكالىق ساياساتكەرلەرگە 20 جىل ىشىندە جالپى قۇنى 45 ملن تەڭگە تۇراتىن باعالى زاتتار سىيلاعان. بۇل تۋرالى PROTENGE تەللەگرام ارناسى حابارلادى. 

"نۇرسۇلتان نازاربايەۆ اقش-تىڭ بۇرىنعى ەلشىسى دجون وردۆەيگە قۇنى  9 995 دوللار تۇراتىن "Blancpain" ساعاتىن سىيلاعان.  قىمبات ساعاتتى امەريكا حاتتاماسىنىڭ باس كەڭسەسى ديپلوماتيالىق پوشتا ارقىلى استانا قالاسىنداعى ەلشىلىكتەن العان. اقش- پرەزيدەنتى مەن شەنەۋنىكتەرى شەتەلدىك ساپارلارىندا العان سىيلىقتاردى جاريالاپ، مەملەكەتتىك مۇراعاتقا تاپسىرادى. ءتىپتى، سىيلىقتىڭ قۇنى 5 مىڭ دوللار بولسا دا وسى ەرەجە ساقتالادى. ايتپەسە، سىيلىق پارا بولىپ ەسەپتەلەدى. ەگەر العان سىيلىعى قاتتى ۇناپ جاتسا ساتىپ الۋعا مۇمكىندىك بەرىلگەن. الايدا امەريكالىقتاردىڭ كوبى سىيلىقتى ساتىپ المايدى"، دەلىنگەن جازبادا. 

جازبا اۆتورى قازاقستاندا مۇنداي تاجىريبە قولدانىلمايتىنىن ايتقان. 

"قازاقستاندىق شەنەۋنىكتەردىڭ قانداي سىيلىق العانىن ءبىز تەك بولجاي الامىز. 20 جىلدىڭ ىشىندە ءبىز امەريكالىقتارعا 101 955 دوللار نەمەسە 45 ملن تەڭگەدەن استام قاراجاتقا سىيلىق جاساپپىز. ەڭ قىمبات سىيلىقتى قازاقستان اتىنان نۇرسۇلتان نازاربايەۆ سىيلاعان. ول 2006 جىلدىڭ مامىرىندا اقش-تىڭ ۆيسە-پرەزيدەنتى ديك چەينيگە 25 مىڭ 300 دوللارعا (11 ملن تەڭگەدەن اسادى - رەد.) باعالانعان  Breguet ساعاتىن سىيعا تارتقان. جوعارى لاۋازىمدى شەنەۋنىك ەنەرگەتيكا ماسەلەلەرىن تالقىلاپ، كاسپيي تەڭىزىنىڭ تۇبىمەن رەسەيدى اينالىپ وتەتىن گاز قۇبىرىن تارتۋ جونىندە ايتۋى كەرەك ەدى. ءبىراق بارىمىزگە بەلگىلى بولعانداي ءىس كەلىسسوزدەن ءارى اسپادى"، دەپ جازادى PROTENGE.