قازاقستاندا رامازان ايى 23 ناۋرىزدا باستالادى، دەپ حابارلادى قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى.
"ءبىز عىلىمي زەرتتەۋلەردىڭ ناتيجەلەرىن ەسكەرە وتىرىپ، ورتالىق ازيا ەلدەرىنىڭ مۇفتيلەرىمەن، ءپاتۋا سالاسىنا جاۋاپتى عالىمدارمەن بىرلەسكەن شەشىم قابىلدادىق. اللا تاعالانىڭ رۇقساتىمەن بيىل رامازان ايى 23 ناۋرىزدا باستالادى. ال 17 ساۋىردەن 18 ساۋىرگە دەيىنگى ءتۇن – ءقادىر ءتۇنى. 21 ءساۋىر – ورازا ايت مەرەكەسى"، - دەدى ناۋرىزباي قاجى تاعان ۇلى.
بيىل ءپىتىر ساداقا مولشەرى 535 تەڭگە بولىپ بەكىتىلدى. ءپىتىر ساداقا سوماسى ەل بويىنشا ەكى كيلوگرامم ۇننىڭ ورتاشا باعاسىمەن ەسەپتەلىنگەن.
"ۇن باعاسى قمدب قالالىق جانە اۋداندىق بولىمشەلەرى بەرگەن اقپارات نەگىزىندە انىقتالدى. ءسىز ءپىتىر ساداقانى قۇرما مەن مەيىز باعاسىمەن تاراتا الاسىز"، - دەدى ناۋرىزباي قاجى تاعان ۇلى.
قازاقستان مۇسىلماندارى ءدىني باسقارماسى قالالار بويىنشا ورازا كۇنتىزبەسىن جاريالادى.
پىكىر قالدىرۋ