17 ساۋىردە بۇرىنعى مادەنيەت جانە سپورت ءمينيسترى ارىستانبەك مۇحامەدي ۇلىنىڭ ۇستىنەن قوزعالعان قىلمىستىق ءىس بويىنشا الدىن الا سوت تىڭداۋى باستالدى. 

الايدا ارىستانبەك مۇحامەدي ۇلى استاناداعى اۋا رايىنىڭ قولايسىزدىعىنا بايلانىستى سوت زالىنا اكەلىنبەي، سوت پروسەسسىنە ونلاين قاتىستى. ەكس–ءمينيستردىڭ ادۆوكاتى سوت وتىرىسىن تۇستەن كەيىن نەمەسە ەرتەڭگە اۋىستىرىپ، ءبارىن وفلاين قاتىستىرۋدى، مۇحامەديۇلىن ءۇيقاماققا اۋىستىرۋدى سۇرادى. الايدا سوت ادۆوكادتىڭ وتىنىشىنەن باس تارتتى.

ەسكە سالا كەتەيىك، ارىستانبەك مۇحامەدي ۇلى 2022 جىلى مامىر ايىندا قاماۋعا الىنعان. جەمقورلىقپەن كۇرەس قىزمەتى ونى باستاپقىدا "بيۋدجەتتىڭ 146 ميلليون تەڭگە قارجىسىن جىمقىرۋعا قاتىستى" دەپ ايىپتاپ، توعىز ايدان كەيىن ول سوما 221 ميلليون 411 مىڭ تەڭگەگە جەتكەن.

بۇرىنعى مينيستر قامالعانى تۋرالى اقپارات شىققان سوڭ، الەۋمەتتىك جەلىدە پرەزيدەنتكە ۇندەۋ جاريالانعان. ۇندەۋدە بۇرىنعى شەنەۋنىك تاعىلعان ايىپتى جوققا شىعارىپ، ونى "وزىنە قاقپان قۇرىپ جۇرگەن كەيبىر ادامداردىڭ ءىسى" دەپ باعالاعان. ادۆوكات بۇگىن بۇل جونىندە دە ايتىپ، "كەك الۋشى" دەپ ءارتىس تۇڭعىشباي جامانقۇلوۆتى اتادى. 

سونىمەن قاتار، ارىستانبەك مۇحامەدي ۇلى 2022 جىلى ۇستالعان ۋاقىتتا وزىنە قول جۇمساماق بولعانى دا ايتىلعان ەدى.