باس اسكەري پروكۋروردىڭ ءبىرىنشى ورىنباسارى ماقسات قازييەۆ قازاقستان جاۋىنگەرلەرىنىڭ كەيىنگى جىلدارداعى ءولىم-جىتىمى تۋرالى ستاتيستيكانى جاريالادى. بۇل مالىمەتكە قاراعاندا، سوڭعى ءۇش جىل ىشىندە 270 اسكەري قىزمەتكەر ولگەن.

«2020 جىلدان باستاپ 270 اسكەري قىزمەتشى قايتىس بولدى: 2020 جىلى – 78 اسكەري قىزمەتشى، 2021 جىلى – 96، 2022 جىلى – 85، 2023 جىلى – 11. ءولىم جاعدايلارىنىڭ ەڭ كوپ تاراعان سەبەپتەرىنە توقتالساق، اۋىرىپ قايتىس بولۋ – 36%، كولىك اپاتىنىڭ سالدارى – 24%، سۋيسيد – 20%. الايدا وز-وزىنە قول سالۋ جاعدايى ءبارىمىزدى الاڭداتىپ وتىر. سۋيسيد پروفيلاكتيكاسىن تالداۋ ناتيجەسى اسكەرىمىزدىڭ قوعامنىڭ ءبىر بولىگى رەتىندە جاعىمسىز جاعدايعا تاۋەكەلى بارىن كورسەتتى»، - دەدى ماقسات قازييەۆ. 

سۋيسيد دەڭگەيى بويىنشا قازاقستان الەم ەلدەرى اراسىندا 20-ورىندا، ال جاسوسپىرىمدەر اراسىندا ۇشتىككە كىرەدى.