پەتروپاۆلداعى سەپاراتيزمدى ناسيحاتتادى دەپ ايىپ تاعىلعان ازاماتتارعا قاتىستى ساراپتاما ناتيجەسى شىقتى. حالىقتىڭ جۇمىسشىلار كەڭەسىن قۇرماق بولعان 3 بەلسەندى قاماۋعا الىندى. بۇل تۋرالى سقو پروكۋراتۋراسى حابارلادى. 

الايدا اتالعان ءىس بويىنشا تەرگەۋ جۇمىستارى اياقتالماعان. بۇعان دەيىن الەۋمەتتىك جەلىدە وزدەرىن قازاقستاننان تاۋەلسىزبىز دەپ جاريالاپ، ۇيىم قۇرعان تۇرعىنداردىڭ جيىن وتكىزگەن ۆيدەوسى پايدا بولعان ەدى. جيىندا 19 ادام جاڭا دەكلاراسيانى، جارعى جوباسىن، سيمۆوليكانى، حالىق كەڭەسىنىڭ ءمورىن بەكىتىپ، 1937 جىلعى قازاق كسر كونستيتۋسياسى بويىنشا ءومىر سۇرەتىندەرىن ايتقان. ولار وزدەرىن "ۇلى وتان سوعىسىندا جەڭىسكە جەتكەن باتىرلاردىڭ ۇرپاعىمىز" دەپ تانىستىرعان. 

"سەپاراتيزمدى ناسيحاتتادى دەپ كۇدىكتەلگەن توپقا ەكى قىلمىستىق ءىس قوزعالعان، ق ر قىلمىستىق كودەكستىڭ 180-بابى 2-بولىگى بويىنشا قازاقستان رەسپۋبليكاسىنىڭ ءبىرتۇتاستىعى مەن تۇتاستىعىن ىدىراتۋدى ناسيحاتتاۋ نەمەسە وعان جاريا تۇردە بۇقارالىق اقپارات قۇرالدارىن جانە تەلەبايلانىس جەلىلەرىن شاقىرۋمەن ماتەريالداردى تاراتۋ جانە قىلمىستىق كودەكستىڭ 179-بابى بويىنشا مەملەكەتتىڭ قاۋىپسىزدىگىن ىدىراتۋدى ۇگىتتەۋ بويىنشا ساراپتالعان. بۇل اۋىر قىلمىستار ساناتىنا كىرەدى. ونىڭ سانكسياسىمەن 10 جىلعا دەيىنگى مەرزىمگە باس بوستاندىعىنان ايىرۋ تۇرىندەگى بالاماسىز جازالاۋ قولدانىلادى. توپتىڭ نەگىزگى ءۇش فيگۋرانتى بۇگىن ءبىر ساعات بۇرىن ۋاقىتشا ۇستاۋ يزولياتورىنا قاماۋعا الىندى"، - دەدى سقو پروكۋراتۋراسى باسقارماسىنىڭ باستىعى عاني جالبي.